Իշխանությանը հլու – հնազանդ ԲԴԽ է պետք․ Լուսանկար

Նախօրեին «Քաղաքացիական պայմանագիրը» որոշեց Բարձրագույն դատական խորհրդի գիտնական անդամի թափուր տեղերի համար առաջադրել Աշոտ Հայրապետյանի, Արմենուհի Հարությունյանի եւ Անահիտ Աբրահամյանի թեկնածությունները։

Հրապարակ թերթը գրել է․ Ովքեր են թեկնածուները: Երեք թեկնածուն էլ արդարադատության նախարարությունում են աշխատել, ամենաբարձր պաշտոնն ունեցել է Արմենուհի Հարությունյանը` եղել է արդարադատության փոխնախարար, Սրբուհի Գալյանի գալուց հետո ազատվել է պաշտոնից։ Նա ավելի քան 20 տարի ԱՆ աշխատակից է եղել, 2016-ից դասավանդում է Արդարադատության ակադեմիայում՝ քաղաքացիական եւ քրեական ուղղվածության դատավորների վերապատրաստման դասընթացներում՝ «Միջազգային իրավական փոխօգնության արդի հիմնախնդիրներ» առարկան։

Անահիտ Աբրահամյանը 2024-ի մայիսի 13-ից մինչ օրս արդարադատության նախարարության «Թարգմանությունների կենտրոն» ՊՈԱԿ-ի տնօրենն է: 2022-2024 թթ. արդարադատության նախարարության միջազգային իրավական համագործակցության վարչության պետն է եղել։ Ավելի վաղ աշխատել է ոստիկանությունում, Դատական դեպարտամենտում։ Աշոտ Հայրապետյանն իրավաբան է:

Մեր տեղեկություններով՝ նախկին նախարար Հովհաննես Մանուկյանի կուրսեցին է, մոտ 54 տարեկան,  երկար տարիներ եղել է նախարարության իրավաբանական ինստիտուտի տնօրենը: Կարեն Անդրեասյանի ժամանակ աշխատանքից դուրս է եկել, այժմ զբաղվում է գիտական գործունեությամբ։ Մեզ ասացին, որ ԲԴԽ գիտնական անդամ դառնալը «նրա մանկության երազանքն է» եղել, պատմեցին, որ ընկերական, շփվող, «ճկվող» կերպար է` «բոլոր իշխանությունների հետ կարողացել է աշխատել»։ Արմենուհի Հարությունյանի եւ Անահիտ Աբրահամյանի մասին եւս նույնն ասացին՝ ենթարկվող են, հարմարվող․ նրանց ընտրությունն էլ պատահական չէ, իշխանությունն ընտրել է այնպիսի անձանց, որոնք կենթարկվեն վերեւից իջած հրամաններին: Նրանց ճանաչող մեր աղբյուրը ցավով արձանագրեց․ «Ու այս մարդիկ դատավորներին են դատելու…»։

Հիշեցնենք․ ԲԴԽ-ում գիտնական անդամի 3 պաշտոն ամիսներ շարունակ թափուր էր: Իշխանությունը չէր կարողանում գտնել այնպիսի գիտնական անդամների, որոնք կհամապատասխանեին ԲԴԽ անդամության պահանջներին եւ սեփական «ես» չէին ունենա, որ նրանց միջոցով կառավարեր ողջ դատական համակարգը, եւ որ դատավորին ուզենար` պաշտոնանկ աներ:

2024 թ. հունիսի 24-ին ԲԴԽ գիտնական անդամ Վիգեն Քոչարյանը լքեց պաշտոնը՝ պաշտոնավարման ժամկետը լրանալու հիմքով, այնուհետեւ ընտրվեց Վճռաբեկ դատարանի դատավոր։ 2024 թ. հոկտեմբերի 23-ին ԲԴԽ գիտնական անդամ Հայկ Գրիգորյանը հեռացավ` ընտրվելով Վճռաբեկ դատարանի դատավոր, իսկ ամենավերջին գիտնական անդամը Նիկոլ Փաշինյանից SMS ստացած ու ԲԴԽ նախագահի պաշտոնից հեռացած Կարեն Անդրեասյանն էր։ Այս տարվա հունվարի 25-ին իշխանությունն առաջադրեց փաստաբան, ՔՊ-ական Ալեքսանդր Սիրունյանի թեկնածությունը՝ ԲԴԽ գիտնական անդամի պաշտոնում, սակայն նրա թեկնածության շուրջ ծագած աղմուկից հետո Սիրունյանը՝ ինքը, հրաժարվեց առաջադրվելուց` հանելով իր թեկնածությունը։