Թուրքիայի նախագահ Ռեջեփ Թայիփ Էրդողանը հերթական ապրիլքսանչորսյան ուղերձով է հանդես եկել։
Ինչպես տեղեկացնում է Ստամբուլի հայկական «Ակօս»-ը, Էրդողանի ուղերձն ընթերցվել է Ստամբուլի հայկական Սուրբ Վարդանանց եկեղեցում Հայոց ցեղասպանության զոհերի ոգեկոչմանը նվիրված պատարագի ժամանակ։
Էրդողանը, ինչպես միշտ, իր ցավակցական ուղերձում նշել է, թե ցավակցում է Առաջին համաշխարհային պատերազմի տարիների դժվարին ժամանակներում մահացած օսմանյան կայսրության հայերին ու նրանց ժառանգներին։
Նշենք, որ 2012 թվականից Թուրքիայի նախագահը նման բովանդակությամբ ուղերձներ է հղում ապրիլի 24-ին։
Թուրքիայի Մարդու իրավունքների ասոցիացիա ՀԿ-ի ռասիզմի և խտրականության դեմ հանձնաժողովը, ինչպես ամեն տարի, այս տարի ևս հայտարարություն է տարածել ապրիլի 24-ի առիթով։
Հայոց ցեղասպանության զոհերի հիշատակին նվիրված հայտարարության մեջ նշվում է, որ անպատիժ մնացած հանցագործությունը դառնում է շարունակական, ժխտողականությունը ցեղասպանությունը դարձնում է անվերջանալի, դահիճն արդարացվում է, իսկ զոհը դառնում մեղադրյալ։
Նշվում է, որ կազմակերպությունը 2005 թվականից ի վեր ամեն տարի՝ ապրիլի 24-ին, պահանջում է վերջ տալ ժխտողականությանը, ընդունել մեղքը՝ բոլոր իրավական հետևանքներով։
Ասոցիացիան նաև դատապարտել է Թուրքիայում Հայոց ցեղասպանության կազմակերպիչներ Էնվերի, Թալեաթի և Ջեմալի հերոսացումը, որը, ըստ կազմակերպության, հրահրում և բորբոքում է ռասիզմը: Ասոցիացիան նաև վստահություն է հայտնել, որ քանի դեռ Թուրքիան ժխտում է Օսմանյան կայսրության իրականացրած ցեղասպանությունը, երկրում անընդհատ արյունահեղություններ տեղի կունենան:
Բաց մի թողեք
Մենք անհամբեր սպասում ենք Հայաստանի հետ մեր ռազմավարական գործընկերության շարունակությանը. Թրամփը ուղերձ է հղել
Պետք է ամեն ինչ անենք, որ նման վայրագությունները չկրկնվեն․ ԵՄ դիտորդական առաքելություն. Լուսանկար
Ֆրանսիայի նախագահի և Հայաստանի դեսպանի հայերեն գրառումները