Թուրքիայի նախագահ Ռեջեփ Թայիփ Էրդողանն ընդունել է Ուկրաինայի նախագահի գրասենյակի ղեկավար Անդրեյ Երմակին: Այդ մասին վերջինս տեղեկացրել թելագրամյան գրառման միջոցով:
«Ստամբուլի հանդիպման (ռուս-ուկրաինական բանակցությունների երրորդ փուլի) նախօրեին Ազգային անվտանգության և պաշտպանության խորհրդի քարտուղար Ռուստեմ Ումերովի գլխավորած ուկրաինական պատվիրակությունը ժամանել է Անկարա և կարևոր հանդիպում ունեցել Թուրքիայի նախագահ Ռեջեփ Թայիփ Էրդողանի հետ»,- գրել է Երմակը, որին մեջբերել է «Անադոլու» գործակալությունը:
Ուկրաինայի նախագահի գրասենյակի ղեկավարի ներկայացմամբ՝ այդ հանդիպմանը քննարկվել են անվտանգության, տարածաշրջանային կայունությանը սպառնալիքների, ինչպես նաև ռազմաարդյունաբերության ոլորտում հետագա երկկողմ համագործակցության մասին:
Երմակը նաև հայտնել է, որ հանդիպումներ է ունեցել Էրդողանի գլխավոր խորհրդականի Քըլըչի և արտաքին գործերի նախարար Ֆիդանի հետ: Ավելի ուշ հայտնի է դարձել, որ Էրդողանն ընդունել է Ռուսաստանի հետ բանակցություններում Ուկրաինայի պատվիրակությանը:
Turkiye պարբերականը, հղում անելով դիվանագիտական աղբյուրների, տեղեկացնում է, որ Ուկրաինայի նախագահի գրասենյակի ղեկավար Անդրեյ Երմակը ժամանել է Անկարա, որպեսզի Թուրքիայի նախագահի հետ քննարկի Վլադիմիր Պուտին-Վլադիմիր Զելենսկի հանդիպում կազմակերպելու հնարավորությունը:
Թուրքական պարբերականը տեսակետ է հայտնում, որ Անկարան ձգտում է Ուկրաինայի հարցով հասնել Թրամփ-Պուտին-Էրդողան-Զելենսկի քառակողմ հանդիպման:
Նախօրեին ԱՄՆ պետքարտուղարության պաշտոնական ներկայացուցիչն ակնարկել է, որ Ուկրաինայում հրադադարի հաստատման ժամկետները «կարող են կրճատվել, եթե (Ստամբուլի) բանակցություններում առաջընթաց արձանագրվի»:
Արձագանքելով այդ հայտարարությանը, ՌԴ նախագահի մամուլի քարտուղար Պեսկովն ասել է, որ Ստամբուլի հանդիպումից «չպետք է ճեղքման սպասել»: Պետք է, սակայն, նկատի ունենալ, որ ռուս-ուկրաինական բանակցությունների երրորդ փուլ կազմակերպելու անհրաժեշտությունն ավելի վաղ քննարկվել է Էրդողան-Պուտին հեռախոսազրույցի ընթացքում:
Անկասկած է, որ Ստամբուլի ռուս-ուկրաինական բանակցություններում ոչ միայն ճեղքում, այլև սուբստանտիվ առաջընթաց չի արձանագրվի: Այդուհանդերձ, այդ հանդիպումը, որ, ամենայն հավանականությամբ, դարձյալ կանցնի Հաքան Ֆիդանի միջնորդությամբ, Թուրքիայի արտաքին, աշխարհաքաղաքական ձեռքբերումն է:
Հարկ է արձանագրել, որ նույն օրը Ստամբուլը կյուրընկալի նաև Իրան-եվրապական «եռյակ» բանակցությունները, իսկ այդ հարցում ԱՄՆ-ի և Ռուսաստանի ներգրավվածոությունը նույնպես փաստ է:
Այս ֆոնին Tutkiye-ն փոխանցում է իսպանական լրատվամիջոցներից մեկի հրապարակումը, որ նվիրված է Սյունիքում հաղորդուղիների բացմանը: Հեղինակի ներկայացմամբ՝ այդ նախագիծն ստացել է «Թրամփի կամուրջ» անվանումը, իսկ գաղափարը հուշել է Թուրքիայի նախագահ Էրդողանը:
Որքանո՞վ են հավաստի իսպանական պարբերականի տեղեկությունները, այլ հարց է: Էական է, որ Թուրքիան մի քանի ուղղությամբ ձգտում է միջազգային կարևոր դերակատարության և այդ հարցում, կարծես, լուրջ բարդությունների չի հանդիպում:
Կարևոր է նաև ընդգծել, որ Մոսկվայի համար Ստամբուլը շարունակում է մնալ Կիևի հետ բանակցությունների ամենահարմար հարթակը, հանգամանք, որ Հայաստանում պետք է գնահատվի իր ողջ խորությամբ:
Բաց մի թողեք
Ալիևը ձգտում է նոր կերպարի մեջ մտնել, հաղթահարել Ռուսաստանի նախագահից կախվածությունը
Օվերչուկը չի բացառել՝ Հայաստանը կարող է Եվրամիության գործընկեր լինել՝ պահպանելով Ռուսաստանի հետ ավանդական կապերը
Նաթանյահուն դե՞մ է Սյունիքում «Թրամփի կամուրջի» բացմանը․ Ինչու ․․․