Հոկտեմբերի 12-15-ին Իսլամաբադում կայանում է Պակիստանի, Թուրքիայի և Ադրբեջանի խորհրդարանների ղեկավարների հանդիպում: Այդ մասին հաղորդում է «Անադոլուն»:
Միջոցառումը կանցնի «Խորհրդարանական համագործակցություն՝ հանուն տարածաշրջանային խաղաղության, անվտանգության և բարգավաճման»:
Պակիստանը, Թուրքիան և Ադրբեջանը վերջին մի քանի տարիներին հարաբերությունները կառուցում են «ռազմավարական դաշնակցության» սկզբունքով և մեծ կարևորություն են տալիս հատկապես զինված ուժերի զարգացմանը և անվտանգային միջոցառումների եռակողմ ծրագրավորմանը:
Թուրքիայի և Ադրբեջանի խորհրդարանների ղեկավարներն Իսլամաբադ են մեկնում մի փուլում, երբ Պակիստանը և Աֆղանստանը գտնվում են լայնածավալ պատերազմի շեմին, որը կարող է ռազամա-աշխարհաքաղաքական նոր իրավիճակ ստեղծել:
Ուշադրություն է գրավում, որ Պակիստանի և Աֆղանստանի միջև զինված բախումներն սկսել են Դուշանբեում Ռուսաստան-Կենտրոնական Ասիայի խորհրդաժողովից ընդամենը երկու օր հետ: Իսկ Ռուսաստանի նախագահի հովանու ներքո անցկացված քննարկումների հիմնական թեման եղել է Աֆղանստանի հետ տարածաշրջանի երկրների սահմանների անվտանգության ապահովումը:
Աֆղանստանում իրավիճակի սրման միտումներ բացահայտվել են ավելի վաղ այն բանից հետո, երբ ԱՄՆ նախագահ Թրամփը հայտարարել է Բագրամ ռազմահենակայանը վերադարձնելու մտադրության մասին:
Կարևոր է դիտարկել, որ ԱՄՆ-ի հետ հարաբերությունների վերբեռնման հարցում Ադրբեջանը մշտապես ընդգծում է Աֆղանստանում ահաբեկչության դեմ պայքարում Միացյալ Նահանգներին ցուցաբերած լոգիստիկ աջակցությունը:
Թուրքիայի և Ադրբեջանի խորհրդարանների նախագահների Իսլամաբադ այցը, որի ընթացքում նրանց կընդունի Պակիստանի վարչապետ Շարիֆը, կարելի է գնահատել իբրև «քաղաքական հետախուզություն»:
Ադրբեջանը Պակիստանի հետ ռազմական փոխադարձ օգնության պայմանագիր ունի, բայց միաժամանակ ձգտում է ներգրավվել Աֆղանստանի տնտեսական և կոմունիկացիոն ծրագրերին:
Բայց ոչ Թուրքիան և Պակիստանը, ոչ, մանավանդ, Ադրբեջանը որևէ սկզբունքային որոշում չեն կարող ընդունել՝ առանց հաշվի առնելու, որ տարածաշրջանը գտնվում է մի կողմից Ռուսաստանի, մյուս կողմից՝ Չինաստանի ազդեցության գոտում, որտեղ վերստին մուտք գործելու մտադրություն ունի Միացյալ Նահանգները:
Բաց մի թողեք
Թաթոյանը Սերժ Սարգսյանի վերաբերյալ հարցերին պատասխանելու փոխարեն նախընտրում է «մինչև վերջ հանվելը»
Մոսկվան գոհ է Երևանի և Անկարայի միջև երկխոսության ակտիվացումից, որը «սկսվել է Ռուսաստանի օգնությամբ»
Ինչպե՞ս է Էրդողանը մարսելու նոր «սուր մանանեխը»