Տարեսկզբից Սիրիայի «հյուսիսային մայրաքաղաք» Հալեպում իրավիճակը լարված է:
Չնայած պետական լրատվամիջոցները հայտնել են քաղաքի քրդաբնակ թաղամասերը «զինառյալներից լիովին մաքրելու» մասին, իրականում մարտերը դադարել են Մերձավոր Արևելքում ԱՄՆ նախագահի հատուկ ներկայացուցիչ Բարաքի Դամասկոս այցից հետո, որի ընթացքում նա հանդիպում է ունեցել Սիրիայի անցումային կառավարության արտգործնախարար Շայբանիի հետ և փոխանցել, որ պետքարտուղար Ռուբիոյի «թիմը պատրաստ է անհրաժեշտ օգնություն ցուցաբերել, որպեսզի կատարվեն ձեռք բերված համաձայնությունները»:
Խոսքը վերաբերում է անցյալ տարվա մարտի 10-ին Սիրիայի նախագահ ալ-Շարաայի և քրդական փաստացի ինքնավարության զինված ուժերի հրամանատար Աբդիի միջև ստորագրված համաձայնությանը, ըստ որի քրդական ուժերը պետք է «ինտեգրվեն սիրիական բանակին», իսկ քաղաքացիական իշխանությունները՝ ճանաչեն «կենտրոնական կառավարությունը»:
Այդ պայմանավորվածությունը գործնականում չի իրականացվել, քրդերը պատրաստ են ինտեգրվել սիրիական բանակին, եթե պահպանվի ինքնապաշտպանական ուժերի կառուցվածքը, սիրիական իշխանությունները պնդում են, որ «մի երկրում երկու բանակ չի կարող լինել»:
Իրավիճակին լրջորեն ազդում է Թուրքիայի դիրքորոշումը: Պաշտոնական Անկարան «Սիրիայի ժողովրդավարական ուժերը» համարում է «Քրդական բանվորական կուսակցության տեղական թև», նրա ենթակայության զինված ուժերն՝ «ահաբեկչական խմբավորումներ» և պահանջում է «անվերապահ զինաթափում»:
Թուրքիան նախագահ Էրդողանի մակարդակով շրջանառել է «Սիրիայի անվտանգությունը մեր անվտանգությունն է» խոսույթ: Ըստ երևույթին, Սիրիայի անցումային կառավարության նախագահ ալ-Շարաան քրդերի «ինտերգրման» հարցում ենթարկվում է նաև արմատական իսլամականների ճնշումներին:
Հալեպում, Սիրիայի հյուսիս-արեւելքի քրդաբնակ շրջաններում իրավիճակը ցանկացած պահի կարող է սրվել: Հակամարտությունը պատմական, քաղաքական ու քաղաքակրթական խոր արմատներ ունի: Տեսանելի հեռանկարում որևէ փոխընդունելի լուծում հազիվ թե գտնվի:
Վերջին մի քանի օրերին դարձյալ տեղեկություններ են տարածվել, որ ամերիկյան սահմանափակ զորախումբը Սիրիայի տարածքում հարվածել է Իսլամական պետության մի քանի հենակետերի:
Թուրքական լրատվամիջոցները, վկայակոչելով կառավարությանը մոտ աղբյուրների, հայտնել են, որ պաշտպանության նախարար Գյուլերը «մինչև փետրվարի վերջը ժամանակ է տվել, եթե մինչ այդ քուրդ ահաբեկիչները չզինաթափվեն, ապա թուրքական բանակը կանցնի պատժիչ գործողությունների»:
Turkiye իշխանամետ պարբերականի ներկայացմամբ՝ «Սիրիայի քուրդ ահաբեկիչները չզինաթափվելու հրահանգ ստացել են Կանդիլից»:
Խոսքն Իրաքի տարածքում քրդական զինված ուժերի կենտրոնակայանի մասին է: Թուրքիան Իրաքի հյուսիսում «հակաահաբեկչական գործողությունների» դիմել է բազմիցս: Թուրքիան քաղաքական իմաստով չի հաղթահարում քրդական հարցը և, ըստ երևույթին, ծրագրում է նոր «հատուկ ռազմագործողություն» անցկացնել Իրաքի հյուսիսում և Սիրիայի անդրեփրատյան տարածքներում:
Բաց մի թողեք
Բաքուն չի հարգել կամ «ստիպված է եղել չհարգել՝ տեղի տալով ամերիկյան ճնշումներին»
Ռուսաստանն Ադրբեջանին քաշում է իր տակ․ Մոսկվան և Բաքուն առնվազն հակադիր ճամբարներում չեն
Ի՞նչ տեղեկության հիման վրա է նման եզրակացության հանգել Եվրոպայում ադրբեջանական վտարանդիությունը