Իրանը փակել է Կասպից ծովում Ադրբեջանի հետ սահմանի օդային տարածքը: Այդ մասին Թեհրանը համապատասխան ծանուցում (NOTAM) է տարածել և զգուշացրել, որ երկրի մակերեւույթից տասը հազար ֆուտ բարձրության վրա իրականացնելու է անօդաչու թռչող սարքերի զորավարժություններ:
Դա նշանակում է, որ այդ գոտում բոլոր տեսակի թռիքչներ չեն իրականացվի, քանի դեռ Իրանը չի հայտարարի զորավարժությունների ավարտի մասին:
Իրանի շուրջ գերլարված իրավիճակի պայմաններում, երբ Իսրայելը կամ ԱՄՆ-ը, կամ երկուսը միաժամանակ ամեն պահի կարող են հրթիռային հարվածների հասցնել իրանական միջուկային օբյեկտներին և այլ «օրինական թիրախների», Թեհրանի կողմից կանխարգելիչ քայլերի ձեռնարկումը միանգամայն օրինաչափ է:
Ավելի վաղ Իրանը ռազմածովային ուժերի զորավարժություններ է անցկացրել Հորմուզի նեղուցում և, ըստ պաշտոնական աղբյուրների, փորձարկել «գերժամանակակից հրթիռ»:
Արևմտյան մամուլը վերջին օրերին գրել է, որ Իրանը Չինաստանից «ձեռք է բերել ռադիոէլեկտրոնային պայքարի արդիական միջոցներ»: Ավելի վաղ նույն աղբյուրները հայտնել են Ռուսաստանից Իրանի ձեռք բերած «հակաօդային պաշտպանության և նոր սերնդի կործանիչների» մասին:
Ամենայն հավանականությամբ, այդ տեղեկությունները եթե ոչ լիովին, ապա առնվազն զգալի չափով մոտ են իրականությանը: Politico-ն փոխանցել է ամերիկյան ռազմական փորձագետների կարծիքը, որ Իրանը Միացյալ Նահանգների համար «այսօր ավելի լուրջ սպառնալիք է, քան անցյալ տարվա հունիսին» էր:
Անցյալ տարվա տասներկուօրյա պատերազմի ընթացքում և դրանից հետո Իրանի մի շարք բարձրաստիճան քաղաքական գործիչներ, ինչպես նաև շատ փորձագետներ պնդել են, որ Իսրայելը «որպես պլացդարմ օգտագործել է Ադրբեջանի տարածքը»:
Ճիշտ է, պաշտոնական Թեհրանը հետագայում հերքել է այդ լուրերը, բայց քաղաքականության մեջ ամեն ինչ չէ, որ միշտ «սև-սպիտակ» դրսևորում է ունենում:
Կասպից ծովում Ադրբեջանի հետ սահմանի օդային տարածքում ԱԹՍ-երի ներգրավմամբ զորավարժությունների անցկացումը բացահայտ վկայություն է, որ Թեհրանն այդ ուղղությունից սպառնալիքի հավանականությունը չափազանց բարձր է գնահատում և ձեռնարկում կանխարգելիչ քայլեր:
Ի՞նչ որակի ԱԹՍ-եր են փորձարկվում, այդ մասին, բնականաբար, հրապարակային տեղեկություն չկա և չի լինի: Հավանական է թվում, որ Իրանը փորձարկում է ռադիոէլեկտրոնային ճնշման միջոցներ, որպեսզի չեզոքացնի հյուսիսային ուղղությունից հակառակորդի հարվածային անօդաչուների և հրթիռների սպառնալիքը:
Խիստ ուշագրավ է, որ փետրվարի 25-ին օկուպացված Մարտունի և Ասկերան ուղևորվելուց առաջ Իլհամ Ալիևը գտնվել է Լենքորանում, որտեղ «արհեստագործական դպրոց է բացել»: Իրանի կողմից թռիչքների համար փակ հայտարարված կոորդինատներից պարզ է դարձել, որ ԱԹՍ-երի զորավարժություններն անցկացվում են Կասպից ծովի այն հատվածում, որտեղ Ադրբեջանի առափնյակը Նևթչալայի, Ջալիլաբադի, Յարդիմիլիի և Լենքորանի շրջանների տարածքն է:
Կապ ունի՞ Ալիևի Լենքորան այցը Իրանի կողմից ԱԹՍ-երի զորավարժություններ անցկացնելու հետ, բարդ է ասել: Բայց, երևի, համընկնումը պատահական չէ:
Բաց մի թողեք
Բաքվում տպավորություն են ունեցել, որ Իրանը TRIPP նախագծի իրացման հարցում կոշտ կհակադրվի Հայաստանին
Ալիևների իշխանությունից զրկվելու դեպքում այդ ճշմարտությունը բացահայտելու են իրենք՝ ադրբեջանցիները
Սպիտակ տունը Թեհրանի հետ «դասական դիվանագիտություն» իրականացնելու մտադրություն չունի