Խորհրդարանական ընտրություններ ՌԴ-ում․ ԱԹՍ-ի հարձակման պատճառով Սոչիի տեղամասերը ժամանակավորապես դադարեցրել են իրենց գործունեությունը

Մոսկվայի վրա հարձակման փորձը վերջին տարիների ամենախոշորներից մեկն էր։ Սեպտեմբերի 17-ի երեկոյան ժամը 20:00-ից մինչև սեպտեմբերի 18-ի առավոտյան ժամը 7:00-ն Մոսկվայի մարզի ուղղությամբ արձակվել է ավելի քան 350 անօդաչու թռչող սարք։

Արտասահմանյան լրատվամիջոցները այս հարձակումը անվանում են վերջին տարիների ամենախոշորներից մեկը։

Մոսկվայի քաղաքապետ Սերգեյ Սոբյանինը հայտնել է, որ սեպտեմբերի 17-ի երեկոյան Մոսկվայի մարզի ուղղությամբ թռչել է ավելի քան 350 անօդաչու թռչող սարք, որոնց մեծ մասը ոչնչացվել է «հեռավոր ինտերվալի վրա»։

Ռուսաստանի մայրաքաղաքին մոտենալիս ենթադրաբար խոցվել է 64 ԱԹՍ։ Քաղաքապետը չի հայտնել հարձակման հետևանքների մասին։

Բացի այդ, ուկրաինական անօդաչու թռչող սարքերը սեպտեմբերի 18-ի գիշերը հարձակվել են Ռոստովի մարզի վրա։

Ազովում վնասվել են հինգ մասնավոր տներ և մեքենաներ։ Նեկլինովսկի շրջանում վնասվել են ութ բնակելի շենքերի տանիքներ և պատուհաններ։

Ուկրաինական Supernova+ Telegram ալիքը պնդում է, որ Դոնի Ռոստովի ավիաբազան ենթարկվել է հարձակման։ Այս տեղեկատվությունը չի հաստատվել։

Ռուսաստանի Դաշնության Սոչիի քաղաքապետ Անդրեյ Պրոշունինի խոսքով՝ անօդաչու թռչող սարքի հարձակման պատճառով տեղի ընտրատեղամասերը ժամանակավորապես դադարեցրել են իրենց գործունեությունը։

Ընտրական հանձնաժողովի անդամները, դիտորդները և ընտրողները տեղափոխվել են ապաստարաններ։

Ընտրատեղամասերը կվերսկսեն իրենց գործունեությունը արտակարգ իրավիճակի ազդանշանի վերացումից հետո։ Սոչիի բնակիչներին և այցելուներին կոչ է արվում մնալ ապաստարաններում մինչև պաշտոնական հաստատումը։

Ռուսաստանի Դաշնությունում մեկնարկել են խորհրդարանական ընտրությունները։ Ընտրությունները կանցկացվեն սեպտեմբերի 18-20-ը։ Դիտորդների թվում են ԱՊՀ-ի, ՀԱՊԿ-ի և ԲՐԻԿՍ-ի 12 միջազգային կազմակերպությունների ներկայացուցիչներ։