Ամոթալի է էթնիկ փոքրամասնության օգտագործումն ընտրակեղծիքների նպատակով. Վրաստանի նախագահ

Վրաստանի նախագահ Սալոմե Զուրաբիշվիլին արձագանքել է Մառնեուլիի 69-րդ տեղամասի միջադեպին և հայտարարել, որ ամոթալի և անբարոյական է էթնիկ փոքրամասնության օգտագործումն ընտրությունները կեղծելու նպատակով:

Հիշեցնենք՝ ըստ տարածված տեղեկությունների` Վրաստանի Մառնեուլի քաղաքի սակրեբուլոյի «Վրացական երազանք» կուսակցության անդամ Ռովշան Իսկենդերովը 69-րդ ընտրատարածքում գտնվող քվեատուփի մեջ բռնի ուժով մի քանի քվեաթերթիկ է լցրել:

Այս փաստը տեսագրել է «Իմ ձայնը» դիտորդական առաքելության դիտորդը, որից հետո ֆիզիկական բռնության է ենթարկվել և վռնդվել ընտրատեղամասից: Տեսագրության կադրերը համացանցում տարածել է նաև Հանրային նախկին պաշտպան Նինո Լոմջարիան:

Մառնեուլիի 69-րդ ընտրատեղամասը փակվել է: Դեպքի առնչությամբ քրեական գործ է հարուցվել։

***

Վրաստանի նախագահ Սալոմե Զուրաբիշվիլին հանդես է եկել հայտարարությամբ և բարձրաձայնել, որ երկրի տարբեր ընտրատեղամասերում և դրանց հարակից հատվածներում բռնի գործողություններ են տեղի ունենում՝ կոչ անելով ոստիկանությանը արագ արձագանքել դեպքերին:

Միևնույն ժամանակ նախագահը նշել է, որ չի կարող կապ հաստատել ներքին գործերի նախարար Վախթանգ Գոմելաուրիի հետ նույնիսկ պաշտոնական կառավարության հեռախոսային կապով:

«Ուզում եմ առանձնացնել շատ վատ փաստեր՝ բռնությունը, որը տեղի է ունենում տարբեր տեղամասերում: Ջարդվում են լրատվամիջոցների սարքավորումները, հավաքվում են խմբեր, որոնց միակ նպատակը լարվածությունն ու առճակատումն է։ Սա տխուր է, սա մեր երկրի դեմքն ու համբավն է։ Սա թուլության նշան է։

Ցանկանում եմ դիմել ՆԳ նախարարին՝ ում հետ, ցավոք, չենք կարող կապ հաստատել, չի գործում նաև պաշտոնական կառավարական գիծը, խնդրում եմ ոստիկանությանն ավելի արագ և արդյունավետ արձագանքել։ Մենք չենք կարող թույլ տալ նման լարվածություն: Շնորհակալություն լրատվամիջոցներին, որոնք աշխատում են շատ ծանր պայմաններում։ Նրանց շնորհիվ մենք բոլորս տեղեկացված ենք»,- ասել է նախագահը։

Հիշեցնենք, որ ընտրական օրը Վրաստանում գերլարված է ընթանում: Տարբեր ընտրատեղամասերում արձանագրվել են ընտրախախտումների, լցոնումների, վիճաբանությունների, ծեծկռտուքների, դանակահարությունների և այլ բռնությունների դեպքեր:

Հոկտեմբերի 26-ին Վրաստանում մեկնարկել են խորհրդարանական ընտրությունները, որի արդյունքները երկրի, հատկապես արտաքին քաղաքական կուրսի համար, վճռորոշ նշանակություն են ունենալու:

Ընտրողների ընդհանուր թիվը 3 մլն 508 հազար 294 է: 150 պատգամավոր ունեցող Վրաստանի խորհրդարանի ընտրություններին, ընդհանուր առմամբ, մասնակցում են 18 քաղաքական կուսակցություններ/միավորումներ: