ԱՄՆ-ը, որ Վենեսուելայում նավթի հոտ է առել, ավելի վտանգավոր է, քան արյան հոտ առած շնաձուկը:
Հունվարի 6-ին Թուրքիայի խորհրդարանում հայտարարել է «Ազգայնական շարժում» կուսակցության առաջնորդ Դեւլեթ Բահչելին: Նա խստորեն դատապարտել է Նիկոլաս Մադուրոյի առևանգումը և Միացյալ Նահանգների նախագահին մեղադրել միջազգային իրավունքը կոպտորեն խախտելու մեջ:
Բահչելին Թուրքիայի խորհրդարանում իշխող «Արդարություն և զարգացում» կուսակցության կոալիցիոն գործընկերն է: ԱՄՆ և նրա նախագահի հասցեին նրա չափազանց կոշտ քննադատությունը վկայում է, որ պաշտոնական Անկարան Թրամփի աշխարհաքաղաքական նկրտումներում Թուրքիայի համար սպառնալիք է դիտարկում:
Այս համատեքստում դիտարժան է, որ տարեսկզբին Թուրքիայի արտաքին գործերի նախարար Ֆիդանը գործուղվել է Պորտուգալիա, որտեղ նա հանդես է եկել Եվրամիության հետ «քաղաքակրթական միություն ձևավորելու» առաջարկությամբ:
Ֆիդանը բարձր է գնահատել ԵՄ հնարավորությունները, բայց «կշտամբել է» Բրյուսելին, որ «չի կարողացել ստեղծել քաղաքակրթությունների միություն»:
«Անադոլու» գործակալությունը հայտնել է, որ Ֆիդանը կմասնակցի Ուկրաինային աջակցության հարցով Փարիզի գագաթնաժողովին և «հանդես կգա որպես նախագահ Ռեջեփ Թայիփ Էրդողանի անձնական ներկայացուցիչ»: Փարիզի գագաթնաժողովը գումարվում է, որպեսզի «ամբողջական տեսքի բերվեն Ուկրաինայի անվտանգության երաշխիքները»:
Ավելի վաղ Ուկրաինայի նախագահ Զելենսկին հույս է հայտնել, որ մինչև հունվարի վերջ «հնարավոր կլինի բարձր մակարդակի հանդիպում կազմակերպել Վաշինգտոնում»:
Թուրքիան, այդպիսով, ձգտում է ներգրավվել Ուկրաինայի անվտանգության եվրոպական երաշխիքների մշակմանը և ռուս-ուկրաինական կարգավորման ԱՄՆ-Եվրամիություն-Ուկրաինա բանակցություններին:
Պետք է ենթադրել, որ Անկարան ձգտում է հետկոնֆլիկտային Ուկրաինայում իր համար ռազմա-քաղաքական ներկայություն ապահովել: Առկա իրավիճակում, երբ ԱՄՆ-Եվրամիություն և Մեծ Բրիտանիա-ԱՄՆ հարաբերությունները, մեղմ ասած, լավագույն ժամանակներ չեն ապրում, Ուկրաինայի եվրոպական աջակիցների շարքում ներկայությունը Թուրքիայի համար չափազանց հեռանկարային է:
Իր ելույթում «Ազգայնական շարժում» կուսակցության առաջնորդ Բահչելին նախանշել է խիստ հավակնոտ նպատակ՝ Կոստանդնուպոլսի գրավման 600-ամյակը Թուրքիան «պետք է նշի որպես «միջազգայնորեն ճանաչված գերտերություն»:
Բահչելիի սահմանած ժամկետը կլրանա 2053 թվականին: Թուրք քաղաքական գործիչն, ընդսմին, մեկնարկած տարին անվանել է «քսանմեկերորդ դարի երկրորդ քսանհինգամյա շրջանի սկիզբ»:
Սա չափազանց խորհրդանշական ժամանակագրություն է, ինչը թույլ է տալիս եզրակացնել, որ Անկարայի աշխարհաքաղաքական հաշվարկները նաև խորհրդապաշտական են:
Այս ֆոնին ընդգծվում է, որ դեռևս տեղեկություն չկա Թրամփ-Էրդողան հեռախոսազրույցի մասին, որ, ինչպես Թուրքիայի նախագահն էր անոնսավորել, պետք է կայանար հունվարի 5-ին:
Էրդողանի ներկայացմամբ, նա Թրամփի հետ պետք է քննարկեր Իսրայելի վարչապետ Նաթանյահուի ԱՄՆ այցից հետո իրավիճակը:
Կարելի է ենթադրել, որ Մադուրոյի առևանգումից հետո ԱՄՆ նախագահը Ռեջեփ Թայիփ Էրդողանին «նոր ասելիք չի ունեցել»: Փոխարենը Նաթանյահուն հունվարի 5-ին խորհրդարանում հայտարարել է, որ Գազայի և Իրանի հարցում Թրամփի հետ «հանգել են ընդհանուր տեսակետի»:
Բաց մի թողեք
ԱՄՆ փոխնախագահը խոսել է Եվրոպայի, Վենեսուելայի նախագահի ձերբակալության մասին
Դոնալդ Թրամփը Վլադիմիր Պուտինին համարժեք գործընկեր չի համարում
Վարչատարածքային բաժանման ի՞նչ մոդել կընտրի Ադրբեջանը, ինչ սպասել Ալիևից