Իրանի բանակը և Իսլամական հեղափոխության պահապանների կորպուսը գտնվում են մարտական լիարժեք պատրաստության մեջ:
Այս մասին հայտարարել է ԻՀՊԿ հրամանատարի խորհրդական, բրիգադային գեներալ Մորթեզա Գորբանին։
«ԱՄՆ-ի և Իսրայելի ցանկացած ագրեսիա արժանի հակահարված կստանա։ Եվ ներկայում բանակի և ԻՀՊԿ-ի շուրջ 400 ստորաբաժանումներ «մատը պահում են ձգանի վրա։ Ստորաբաժանումները պատրաստ են։ Եթե որևէ ագրեսիա տեղի ունենա, նրանք այն (Իսրայելը – խմբ.) հողին կհավասարեցնեն», – ասել է գեներալը։
Հիշեցնենք, որ դեկտեմբերի վերջից Իրանում զանգածային բողոքի ցույցեր են երկրում բարձր գնաճի և ազգային արժույթ ռիալի կտրուկ արժեզրկման պատճառով։
Իրանի նախագահ Մասուդ Փեզեշքիանը խոստովանել է, որ տնտեսական վիճակն իսկապես վատթարացել է, իսկ ցուցարարների պահանջներն օրինական են։ Նա կոչ է արել կառավարությանը՝ իրավիճակը շտկելու համար միջոցներ ձեռնարկել: Բողոքի ակցիաներն ուղեկցվում են ցուցարարների և իրավապահների միջև բախումներով, կան մի քանի տասնյակ զոհեր, տեղի են ունենում զանգվածային ձերբակալություններ։
Այս ամենի ֆոնին ԱՄՆ նախագահ Դոնալդ Թրամփը հայտարարել է, որ եթե Իրանի իշխանությունները բռնի ուժ կիրառեն և ցուցարարների սպանեն, Վաշինգտոնը պատրաստ է պաշտպանել ակցիայի մասնակիցներին և նույնիսկ հարվածել Իրանին։
***
ԱՄՆ Պետքարտուղարությունը պարսկերենով հայտարարություն է տարածել Իրանում տիրող իրավիճակի վերաբերյալ՝ ընդգծելով, որ երկրում բողոքի ցույցերը շարունակվում են արդեն տասը օր, չնայած կառավարության կողմից բռնաճնշումների սրմանը։
Հայտարարության մեջ նշվում է, որ իրանցիները ամբողջ երկրում՝ շուկաներում, թաղամասերում և համալսարաններում, շարունակում են ցույցեր անցկացնել։
Պետդեպի տվյալներով՝ առնվազն 29 ցուցարար է զոհվել, իսկ ավելի քան 1200 մարդ ձերբակալվել է, սակայն բողոքի շարժումը շարունակում է մնալ անդադար։
«Չնայած բռնության սպառնալիքներին և խիստ պատիժներին՝ իրանցիները շարունակում են պահանջել արդարություն և ազատություն։ Նրանց քաջությունը նման լուրջ վտանգների առջև իսկապես զարմանալի է», – նշվում է հայտարարության մեջ։
Վաշինգտոնը ընդգծել է, որ իրանական հասարակության վճռականությունը պահպանում է արդարության հույսը, նույնիսկ ռեժիմի կողմից խիստ ճնշման տակ։
Բաց մի թողեք
«Սա վերջին մարտն է, Փեհլևին կվերադառնա». Իրանն անհանգիստ է, ցուցարարները գրավել են քաղաքների մեծ մասը
«Անմիջապես կրակ բացել»․ ինչպես են Դանիայում պատրաստվում Գրենլանդիա ԱՄՆ-ի հնարավոր ներխուժմանը
Իրանը պատրաստ է նոր պատերազմին․ Արաղչի