Թուրքիայում երկու տարվա ընդմիջումից հետո որոշել են գումար հատկացնել հայկական տպագիր մամուլին

Թուրքիայի պետական համարվող Մամուլի խորհուրդը 2 տարի ընդմիջումից հետո որոշում է կայացրել 2024-ին ֆինանսական աջակցություն հատկացնել հայերի, հույների եւ հրեաների տպագիր մամուլին։

Ինչպես տեղեկացնում է Ստամբուլի հայկական «Ակոս»-ը, Մամուլի խորհրդի որոշմամբ 300 հազար լիրա կհատկացվի ազգային փոքրամասնությունների տպագիր մամուլին, որը միմյանց միջեւ կբաշխվի՝ ըստ համամասնության։

2022-ից այս կողմ թուրքական իշխանությունները դադարեցրել էին ֆինանսական աջակցությունը։

Ազգային փոքրամասնությունների լրատվամիջոցների ներկայացուցիչները սպասում էին, որ նոր ֆինանսական աջակցությունը մի քանի տարվա առաջվա համեմատ ավելին կլինի, քանի որ երկրում խոշոր ինֆլյացիա է տեղի ունեցել, սակայն իշխանությունները նույն չափի գումար են հատկացրել, ինչ 2 տարի առաջ։

Ազգային փոքրամասնությունների տպագիր մամուլին ֆինանսական աջակցությունը տրամադրվում է՝ ըստ Լոզանի պայմանագրով՝ Թուրքիայի ընդունած պարտավորվածության։