Հայ-թուրքական սահմանը կբացվի երրորդ երկրի քաղաքացի հանդիսացող անձանց և դիվանագիտական անձնագրեր ունեցողների համար, իսկ հետագայում այս պրակտիկան կընդլայնվի Թուրքիայի և Հայաստանի քաղաքացիների համար:
Այս մասին ասել է հայ-թուրքական հարաբերությունների կարգավորման հարցերով Թուրքիայի բանագնաց Սերդար Քըլըչը Թուրքիայի Անթալիա քաղաքում դիվանագիտական ֆորումի շրջանակներում տեղի ունեցած «Խաղաղությունը, զարգացումն ու կապվածությունը Հարավային Կովկասում» խորագրով պանելային քննարկման ելույթի ժամանակ:
Նա հիշեցրել է, որ Հայաստանից Թուրքիա և հառակ ուղղություններով իրականացվում են չվերթներ, ինչը նշանակում է՝ երկու երկրի քաղաքացիների միջև երկխոսություն կա:
«Սահմանների բացումը միակ քայլը չէ, մենք այլ քայլեր էլ ենք ձեռնարկում իրավիճակի կարգավորման համար: Մենք բարենպաստ պայմաններ ենք ստեղծում Թուրքիայում ՀՀ քաղաքացիների ապրելու համար, վերջիններս անգամ ներդրումներ են անում Ստամբուլում: Այսինքն՝ ջանքեր գործադրվում են, և երբ գա ժամանակը, սահմանի լիարժեք բացումը կնպաստի երկու ժողովրդի մերձեցմանը», – նշել է թուրք դիվանագետը:
Նա հավելել է, որ Հայաստանի հետ հարաբերությունների կարգավորման շուրջ բանակցությունների շարունակման հետ մեկտեղ Թուրքիան անում է իրենից կախված հնարավոր ամեն ինչ, բանակցային արդյունքները պետք է դրական ազդեցություն ունենան երկու կողմի համար:
«Սակայն եթե անցյալից դասեր չքաղենք, ամեն ինչ ապարդյուն է լինելու: Կայուն խաղաղության և անվտանգության հաստատման համար պետք է հաշվի առնել երեք երկրի՝ Հայաստանի, Թուրքիայի, Ադրբեջանի վիճակը», – նշել է Քըլըչը:
Ըստ նրա՝ կարգավոման գործընթացը բավականին բարդ է, հնարավոր չէ իսկույնևեթ արդյունքի հասնել:
«Կարծում եմ՝ կարելի է հաղթահարել որոշ տարաձայնություններ և շարունակել բանակցությունները, միշտ էլ կարելի է որոնել հարցերի լուծումը», – եզրափակել է Քըլըչը:
Բաց մի թողեք
Հայաստանի հավաքականը 4։1 հաշվով հաղթեց Լատվիայի ընտրանուն. Լուսանկարներ
Սեպտեմբերի 8-ի աստղագուշակ․ Օրը կպսակվի հաջողությամբ, եթե դուք հաստատակամ և հետևողական լինեք
Օդի ջերմաստիճանը կնվազի, ապա կրկին կբարձրանա