Հայաստանի Հանրապետության սուվերեն տարածքի վրա տեղի է ունեցել ռազմական գործողություն, ու ՀԱՊԿ-ը համապատասխան գնահատական չի տվել:
Այս մասին ԱԺ-ում հայտարարել է Տարածաշրջանային և եվրասիական ինտեգրման հարցերի հանձնաժողովի փոխնախագահ Վաղարշակ Հակոբյանը՝ հավելելով, որ կան որոշակի գործողություններ, որոնք պետք է իրականացնել:
Ի տարբերություն ՀԱՊԿ-ի՝ ԵԱՏՄ բլոկում, ըստ Վաղարշակ Հակոբյանի, բավականին արդյունավետ գործունեություն է ծավալվում։
«Մինչև այս պահը Հայաստանը շարունակում է ԵԱՏՄ նախագահությունը, ես կարծում եմ, որ ԵԱՏՄ-ն բավականին լուրջ հնարավորություններ է մեր տնտեսությանը ընձեռել ու ընձեռում»,- նշել է Հակոբյանը:
Պատգամավորի խոսքով՝ Հայաստանը ԵԱՏՄ կանոնադրությամբ ու ԵԱՏՄ օրենքներով սահմանված կարգով է առաջնորդվելու ու կատարելու ստանձնած պարտավորությունները։
Հայաստանը մտադիր է ամբողջությամբ կատարել ԵԱՏՄ մարմիններում նախագահության գործառույթները, դրան չի խանգարի Միջազգային քրեական դատարանի (ՄՔԴ) Հռոմի կարգավիճակի ստորագրումը։
Այս մասին Ազգային ժողովի տարածաշրջանային և եվրասիական ինտեգրման հարցերի մշտական հանձնաժողովի նիստի ժամանակ հայտարարել է «Քաղաքացիական պայմանագիր» խմբակցության անդամ, տարածաշրջանային և եվրասիական ինտեգրման հարցերի մշտական խորհրդարանական հանձնաժողովի փոխնախագահ Վաղարշակ Հակոբյանը։
«Հայաստանը վավերացրել է Հռոմի կանոնադրությունը՝ մեր երկրի և նրա քաղաքացիների համար անվտանգության լրացուցիչ երաշխիքներ ձեռք բերելու համար, իսկ ԵԱՏՄ-ում Հայաստանի նախագահության իրականացումը բոլորովին այլ աշխատանքային գործընթաց է։ Ես նպատակահարմար չեմ համարում այս երկու գործընթացները խառնել։
Վստահեցնում եմ, որ ԵԱՏՄ-ում Հայաստանի նախագահությունը չի ենթադրում ոչ մի գործողություն, որի մասին դուք խոսում եք, մենք ամբողջությամբ կկատարենք մեր պարտավորությունները»,- վստահեցրել է նա՝ պատասխանելով ընդդիմադիր պատգամավոր Ագնեսա Խամոյանի հարցին, թե Հռոմի ստատուտի ստորագրումը կարո՞ղ է հետ պահել Հայաստանին ԵԱՏՄ-ում ստանձնած պարտավորությունների կատարումից:
Խամոյանը պատասխանից հետո ևս մեկ անգամ հարցրել է, թե ԵՏԱՄ նիստ տեղի ունենալո՞ւ է, ՌԴ նախագահ Վլադիմիր Պուտինը գալո՞ւ է Հայաստան, քանի որ ՀՀ-ն վավերացրել է Հռոմի ստատուտը:
Ի պատասխան՝ Հակոբյանը նշել է, որ այդ հարցին ՀՀ պաշտոնական մարմինները քանիցս անդրադարձել են, իսկ ինչ վերաբերում է ԵԱՏՄ նիստի անցկացմանը, Հայաստանը պատրաստվում է ամբողջությամբ կատարել նախագահության բոլոր պարտավորությունները:
Բաց մի թողեք
Ալիևի անհավատալի արկածներն Իտալիայում՝ ոչ միայն որպես Ադրբեջանի նախագահ, այլև՝ ՌԴ նախագահի «լիազոր ներկայացուցիչ»
Մոսկվան Ադրբեջանի եւ Թուրքիայի հետ որեւէ «ոչ պակաս ընդգրկուն» պայմանավորվածությամբ չի հարվածի «թիկունքից»
«Դիմադրության» շարժման «սրբազան» շարունակությունը․ առաջիկա հավաքին իրական շահառուները դուրս կգա՞ն «փարդի հետևից»