Լեհաստանը կփակի Կրակովում Ռուսաստանի հյուպատոսությունը. ռուսական կողմն արձագանքել է

Լեհաստանի արտգործնախարար Ռադոսլավ Սիկորսկին հայտարարել է, որ որոշել են փակել Կրակովում ՌԴ հյուպատոսությունը, հայտնում է Onet-ը։

Նա հյուպատոսության փակումը կապել է Լեհաստանի իշխանությունների տվյալների հետ, որոնց համաձայն՝ ռուսական հետախուզական ծառայությունները ներգրավված են եղել Վարշավայի Marywilska 44 առևտրի կենտրոնում 2024 թվականի մայիսի 12-ին բռնկված հրդեհին։

Ռուսաստանը Լեհաստանում ունի երեք գլխավոր հյուպատոսություն՝ Կրակովում, Գդանսկում և Պոզնանում։ Վերջինս փակվել է 2024 թվականի աշնանը, երբ Սիկորսկին հայտնել էր Մոսկվայի կողմից դիվերսիոն գործողությունների «համոզիչ ապացույցների» առկայության մասին։ Այսպիսով, Գդանսկում միայն կշարունակի գործել Ռուսաստանի գլխավոր հյուպատոսությունը։

ՌԴ ԱԳՆ պաշտոնական ներկայացուցիչ Մարիա Զախարովան մեղադրել է Լեհաստանին երկկողմ հարաբերությունների միտումնավոր խզումը շարունակելու համար և հայտարարել, որ Լեհաստանը կարող է սպասել «համարժեք պատասխանի»։

Վարշավայի Marywilska 44 առևտրի կենտրոնում խոշոր հրդեհ է տեղի ունեցել 2024 թվականի մայիսի 12-ին: Հրդեհը սկսվել է միանգամից մի քանի վայրերում և արագ տարածվել, հաղորդել է հրշեջ ծառայությունը։

Հրդեհն ամբողջությամբ պատել է շենքը, և այն մասամբ փլուզվել է։ Այդ ժամանակ ոչ ոք չի տուժել, սակայն, ըստ իշխանությունների, այրվել են 1400 խանութ և սպասարկման ոլորտի ձեռնարկությունների տարածքներ: Լեհաստանի վարչապետ Դոնալդ Տուսկը հայտարարել է միջադեպին Մոսկվայի հնարավոր մասնակցության վարկածը հետաքննելու մտադրության մասին։