11/07/2025

Աբու Դաբիում Փաշինյան – Ալիև հանդիպումը մեկնարկել է, Բաքվում պատմական են որակում

Աբու Դաբիում (ԱՄԷ) սկսվել է Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի հանդիպումը։

Ադրբեջանական մամուլն առանձնահատուկ ոգևորությամբ և ուշադրությամբ է հետևում դրանց:

Իշխանամերձ Մինվալ-ի հաղորդմամբ՝ Աբու Դաբիում անցկացվող հանդիպումը իրավամբ համարվում է վերջին տարիների ամենակարևոր և պատմական հանդիպումներից մեկը։ ԱՄԷ մայրաքաղաքի ընտրությունը պատահական չէ. Միացյալ Արաբական Էմիրությունները բարեկամ երկիր է, որը ո՛չ հակամարտության կողմ է, ո՛չ էլ միջնորդ՝ իր շահերով։

Կայքը պնդում է, որ բանակցությունների վայրի ընտրության նախաձեռնողը Ադրբեջանն է եղել։ Բաքուն ընդգծում է, որ հայ-ադրբեջանական բանակցություններին երրորդ կողմերի մասնակցության անհրաժեշտություն չկա. քննարկումները տեղի են ունենում երկկողմ ձևաչափով՝ ադրբեջանական կողմի պնդմամբ։

Չնայած այս հանդիպման շրջանակներում խաղաղության համաձայնագրի ստորագրում չի սպասվում, երկխոսությունն ինքնին համարվում է դրա ավարտին ուղղված կարևոր քայլ, ընդգծում է Մինվալ-ը։

Նշվում է նաև, որ քննարկման հիմնական թեմաներից մեկը կլինի  այսպես կոչված Զանգեզուրի միջանցքի բացման հարցը։