Սպիտակ տան տակը տեղակայված գաղտնի բունկերը կարող է խանգարել ԱՄՆ նախագահ Դոնալդ Թրամփին այնտեղ ավարտել պարահանդեսային դահլիճի շինարարությունը, գրել է «The Washington Post»-ը։
Ավելի վաղ ԱՄՆ Գերագույն դատարանը ժամանակավորապես չեղարկել էր Սպիտակ տանը պարահանդեսային դահլիճի կառուցման արգելքը, որին դեմ էր Պատմական հուշարձանների պահպանման ազգային հիմնադրամը: Ինքը՝ Թրամփը, նոր պարահանդեսային դահլիճի անհրաժեշտությունը բացատրել էր նրանով, որ դրա տակ կկառուցվի «հսկայական համալիր»՝ ԱՄՆ նախագահին պաշտպանելու համար:
Ինչպես հաղորդել է «The Washington Post»-ը, նախկին պաշտոնյաները նշել են, որ շենքի տակ արդեն գոյություն ունի լավ պաշտպանված բունկեր, որը կառուցվել է ավելի քան 10 տարի առաջ՝ Օբամայի վարչակազմի օրոք: Երեք աղբյուրներ ասել են, որ այն կարող է ապաստան տրամադրել նախագահին և նրա գլխավոր օգնականներին արտակարգ իրավիճակի դեպքում:
Երկու նախկին պաշտոնյաներ նշել են, որ սենյակը կարող է տեղավորել «տասնյակ մարդկանց» մինչև մի քանի շաբաթ։ Նրանք ասել են, որ բունկերը գտնվում է ավելի քան 60 ոտնաչափ (18 մետր) խորության վրա և կարող է դիմակայել միջուկային պայթյունին։
Այնուամենայնիվ, անվտանգ սենյակի առկայությունը խաթարում է Թրամփի վարչակազմի այն փաստարկը, որ պարահանդեսային դահլիճը պետք է ավարտվի՝ ԱՄՆ ազգային անվտանգության համար դրա նշանակության պատճառով, նշել են նախկին պաշտոնյաները։
Սպիտակ տան արևելյան թևի վերակառուցումը պարահանդեսային դահլիճի կառուցման համար սկսվել է 2025 թվականին։ Նախագիծը, որը գնահատվում է 400 միլիոն դոլար, ֆինանսավորվում է Թրամփի սեփական միջոցներով և մասնավոր դոնորների նվիրատվություններով։ Աշխատանքների սկսվելուց հետո Պատմական հուշարձանների պահպանման ազգային հիմնադրամը դատական հայց է ներկայացրել նախագծի դեմ՝ պնդելով, որ Թրամփի վարչակազմը շինարարությունը սկսել է առանց անհրաժեշտ թույլտվությունների։ Ապրիլին դաշնային դատավորը դադարեցրել է պարահանդեսային դահլիճի շինարարությունը մինչև Կոնգրեսի հաստատումը ստանալը։
Հետագայում դատարանները շարունակել են քննարկել նախագծի օրինականության վերաբերյալ վեճը։ ԱՄՆ վերաքննիչ դատարանը թույլատրել է շարունակել աշխատանքները օբյեկտի վրա, սակայն շինարարությունը մնացել է դատական վեճի առարկա։ Անցյալ շաբաթ ԱՄՆ Գերագույն դատարանը թույլատրեց դահլիճի շինարարությունը։
2018 թվականին «Washington Examiner» թերթը հաղորդել էր Սպիտակ տան տակ գտնվող հինգհարկանի ստորգետնյա ապաստարանի մասին, որի շինարարությունը սկսվել էր Բարաք Օբամայի նախագահության օրոք՝ 2010 թվականին, և արժեցել էր 400 միլիոն դոլար։ Հաստատությունը կառուցվել էր զանգվածային ոչնչացման զենքի կիրառմանը դիմակայելու համար և կարող էր անորոշ ժամանակով տեղավորել Սպիտակ տան ամբողջ Արևմտյան թևի աշխատակիցներին։
Բաց մի թողեք
Լիտվայի զինված ուժերը Վիլնյուսի մատույցներում տեղակայել են NASAMS ՀՕՊ համակարգեր
Զելենսկին Պուտինին զսպելու կոչով դիմել է Չինաստանին
Նոր մեղադրանքներ՝ ընդդեմ Վրաստանի նախկին վարչապետի