Բարտեր են արել, Գեղամ Նազարյանին ուղարկել ՔՊ-ականների մոտ

«Հայաստան» խմբակցությունը վերջերս խմբակցությունից հեռացված պատգամավոր Գեղամ Նազարյանից պահանջել է, որ հեռանա նաեւ խմբակցությանը հատկացված հարկաբաժնից եւ իր աշխատասենյակը տեղափոխի խորհրդարանի մեկ այլ հարկաբաժին։

«Հրապարակը» գրում է․ Նազարյանը փորձել է համոզել, որ տարիուկես է մնացել, տեղափոխություն անելու իմաստ չկա, սակայն ընդդիմադիրները պնդել են, թե ուզում են, որ խմբակցության պատգամավոր Արթուր Խաչատրյանը տեղափոխվի իրենց մոտ, որի աշխատասենյակը խորհրդարանի նոր ֆոյեում է՝ պետաիրավական հարցերի մշտական հանձնաժողովի հարկաբաժնում՝ ՔՊ-ականների հարեւանությամբ։

Ի վերջո, բարտեր են արել՝ Նազարյանին ուղարկելով ՔՊ-ականների մոտ՝ Արթուր Խաչատրյանի զբաղեցրած աշխատասենյակ, իսկ Խաչատրյանին բերել են խմբակցությունից հեռացած Նազարյանի սենյակ։