Ադրբեջանի նախկին պետական քարտուղար, նախկին վարչապետ, Միլլի մեջլիսի նախկին պատգամավոր, «Ժողովրդական կուսակցության» նախկին առաջնորդ Փանահ Հուսեյնովը azpost. Info կայքին հարցազրույցում հերքել է իր հասցեին քաղաքագետ Զարդուշտ Ալիզադեի հնչեցրած մեղադրանքը և հավաստիացրել, որ 1988թ. հոկտեմբերին Բաքվի Լենինի անվան հրապարակում ինքը մարդկանց նստացույցի կոչ անելիս չի ասել «ով չնստի, նա հայ է»:
Հուսեյնովը, սակայն վկայել է, որ նման կարգախոս հնչել է, բայց «դա արել են ակցիայի մասնակից մի քանի ակտիվիստներ»:
Հուսեյնովը միաժամանակ խոստովանել է, որ 1990թ. հունվարի 13-15-ին եղել է Բաքվի հայ բնակչության բռնատեղահանության կազմակերպիչներից մեկը: Նա, սակայն, «հիմնավորել է», որ իրենք տեղեկություն ունեին, որ խորհրդային «ՊԱԿ-ը մտադիր է Ադրբեջանի մայրաքաղաքում կրկնել Սումգայիթի դեպքերը, ուստի կազմակերպել և հայերին գնացքով, օդանավերով ճանապարհել են Հայաստան»:
Այդ օրերին Ադրբեջանի ժողովրդական ճակատի զինված խմբավորումներից մեկի հրամանատար հանդիսացած Հուսեյնովն, իհարկե, իրականությունը կեղծում է. Բաքվի հայ բնակչությունը բռնատեղահանվել է հիմնական Թուրքմենստանի Կրասնովոդս քաղաքը: Բայց գլխավորը փաստական վկայությունն է, որ նա տալիս է, խորհրդային Ադրբեջանի մայրաքաղաք Բաքվից իրականացվել է հայ բնակչության զանգվածային բռնատեղահանություն:
Իսկ թե ինչ պատճառով է դա տեղի ունեցել, ադրբեջանցի նախկին բարձրաստիճան պաշտոնյան տալիս է կողմնակի թվացող, բայց իրականում ամենահիմնավոր բացատրությունը: Նա ասում է, որ միայն Բաքվի գործարաններից մեկում աշխատում էր 700 հայ, բայց «նրանցից ոչ մեկը Ղարաբաղում սկսված շարժման դեմ ոչ մի խոսք չի ասել»:
Ըստ երևույթին մտովի վերապարելով այդ օրերի «հերոսականությունը», Հուսեյնովը հռետորական հարցադրում է արել. «Որքա՞ն հայ է ապրել Բաքվում, որևէ մեկը նրանցից ղարաբաղյան անջատողականությունը դատապարտող խոսք լսե՞լ է»:
Մասնագիտությամբ պատմաբան, այդ շրջանում Ադր.ԽՍՀ Գիտությունների ակադեմիայի Փիլիսոփայության և իրավունքի ինստիտուտի գիտաշխատող հանդիսացած Հուսեյնովն սկզբունքորեն չպետք է իմանար, թե Բաքվի որ գործարանում քանի հայ է աշխատում:
Բայց նա բերում է վիճակագրական փաստ ինչը վկայում է, որ Ժողճակատի գրոհայիններն ունեցել են Բաքվի ավելի քան երկու հարյուր հիսուն հազար հայ բնակչության անձնական տվյալները և գործել են իշխանության և պետական մարմինների իմացությամբ:
Հուսեյնովի հարցազրույցը փաստական վկայություն է, որ Ադրբեջանում հայ ինքնությունը հետապնդվել է և ենթարկվել բռնատեղահանության միայն նրա համար, որ Լեռնային Ղարաբաղում սկսված ինքնորոշման շարժումը չի դատապարտել:
Կամա, թե ակամա, բայց ժամանակին Հեյդար Ալիևի հրահանգներով Բաքվում հայկական ջարդեր և զանգվածային բռնատեղահանություն կազմակերպած Փանահ Հուսեյնովը մերկացնում է Իլհամ Ալիևին:
«Արևմտյան Ադրբեջանի» մասին Ալիևի խոսույթը հակադարձվում է նրա հոր կողմից վարչապետ նշանակված Հուսեյնովի «հպարտ» բացահայտումներով:
Բաց մի թողեք
Հայաստանի հետ հարաբերություններում առաջ շարժվելու համար նախ անհրաժեշտ է համաձայնության գալ Ադրբեջանի հետ. Թուրք նախարար․ Լուսանկար
Ադրբեջանը իր «ազգային հերոսի» դիակը ընդունելու մտադրություն չունի
Նոր տարում Ուկրաինան գրոհի կենթարկվի նաև հյուսիսից