Համաձայն չեմ, որ ՔՊ-ից չէ Գյումրու քաղաքապետի պաշտոնակատարը. Խուդաթյան

«Այս վիճակը կառավարման ճգնաժամ էր առաջացել Գյումրիում, մասնավորապես այն գործընկերները, որոնք նշանակված էին կառավարելու քաղաքը, և ավագանու այն անդամները, որոնք ընտրված էին ղեկավարելու քաղաքը, իրենք ինչ-որ պահ դուրս մնացին կառավարման պրոցեսից, արդյունքում ունեցանք ճգնաժամային իրավիճակ, որը հանգուցալուծվեց Կառավարության ընդունած որոշմամբ»:

Այս մասին Գյումրիում լրագրողների հետ ճեպազրույցի ժամանակ ասաց ՀՀ տարածքային կառավարման և ենթակառուցվածքների նախարար Դավիթ Խուդաթյանը՝ անդրադառնալով Գյումրիում իրականացված նախնական ընտրություններին:

Հարցին՝ այս մոդելը կկիրառվի՞ մյուս համայնքներում, վերջինս պատասխանեց. «Փրայմըրիզի այն մոդելը, որը փորձնական աշխատել է Գյումրիում, մեր քաղաքական թիմի արձանագրումը այն է եղել, որ հաջողությամբ է աշխատել, մենք ունենք շոշափելի արդյունք, իսկ շոշափելի արդյունք ասելով՝ նկատի ունեմ, որ ժողովուրդն է ընտրել Գյումրիում քաղաքապետի պաշտոնակատարին, և մենք այսպիսի նախադեպ չէինք ունեցել: Կարծում եմ՝ իր արդյունավետությունը մեզ թույլ է տալիս այն համոզմունքը ունենալ, որ առաջիկայում այն համայնքներում, որտեղ «Քաղաքացիական պայմանագիր» կուսակցությունը համայնքի ղեկավար ընտրելու անհրաժեշտություն ունի, այս մոդելը կարող է կիրառել»:

Հարցին՝ Գյումրու ավագանու լուծարման համար որոշում է ստորագրվել, ինչպե՞ս է այս ընթացքում աշխատելու համայնքապետարանը, նախարարը նշեց. «Համայնքում կա համայնքի ղեկավարի պաշտոնակատար, որը կկայացնի համապատասխան որոշումներ: Հույս ունեմ՝ գործընկերները, ովքեր այս պահին աշխատում եմ համայնքապետարանում, մեծամասնությունը կշարունակի նույն պատասխանատվությամբ աշխատել, և կառավարման խնդիրներ չենք ունենա»:

Խութադյանը անհիմն համարեց այն մեղադրանքները, թե առաջիկա ընտրություններին իշխող ուժը հնարավոր է՝ վարչական լծակ կիրառի. «ՔՊ-ն իր կառավարման տարիների ընթացքում ցույց է տվել, որ վարչական ռեսուրս կիրառելու անհրաժեշտություն չունի»:

Ըստ նրա՝ Գյումրու ընտրված պաշտոնակատարը առաջիկայում սպասվող ընտրություններում գլխավորելու է իշխող թիմի ցուցակը. «ՔՊ-ն ունի որոշում, որ փրայմըրիզի հաղթողը նաև գլխավորելու է ցուցակը»:

Հարցին, թե ինչպե՞ս եղավ, որ անկուսակցական թեկնածուն հաղթեց, նախարարը նկատեց. «Մեր թեկնածուն՝ Գյումրիի պաշտոնակատարը, վարչության կողմից ընտրված, կուսակցական ֆիլտրերով անցած թեկնածու է, և ես չեմ համաձայնում, որ ՔՊ-ից չէ թեկնածուն, իսկ ո՞ր քաղաքական ուժից է, եթե ՔՊ-ական չէ: Գյումրիում «Քաղաքացիական պայմանագիր» կուսակցության հեղինակության մասին կփաստեմ թվերով, նախորդ ընտրություններին մեր ստացած ձայներով, նկատի ունեմ նաև վերջին խորհրդարանական ընտրությունները: Որպես կուսակցություն մենք մտահոգվելու պատճառ և առիթ չենք տեսնում, մեր թիմը՝ ներառյալ Գյումրիի գործընկերները, ամբողջությամբ տրամադրված են նախընտրական քարոզարշավին մասնակցելուն»: