ԲԴԽ անդամներն ինքնաբացարկ հայտնեցին, դատավորները չէին ներկայացել նիստին

Բարձրագույն դատական խորհուրդը այսօր նիստ էր հրավիրել Վերաքննիչ վարչական դատարանի դատավորներ Ռուստամ Մախմուդյանին, Հրաչ Այվազյանին և Կարեն Ավետիսյանին կարգապահական պատասխանատվության ենթարկելու հարցի վերաբերյալ։

Սկզբում քննարկվեցին խորհրդի անդամներ Քրիստինե Մկոյանի եւ Կարեն Թումանյանի ինքնաբացարկի միջնորդությունները։

Մկոյանը հայտնեց` վարչական գործով, որը հիմք է դարձել վարույթի հարուցման համար, Վճռաբեկ դատարանում մասնակցել է գործի քննությանը։ Թումանյանն էլ հայտնեց, որ Հրաչ Այվազյանի հետ ունի ընկերական հարաբերություններ, հետևաբար գտնում է, որ պետք է ինքնաբացարկ հայտնի։

Խորհուրդը հեռացավ խորհրդակցական սենյակ, այնուհետև վերադարձավ ու հայտնեց, որ ինքնաբացարկի միջնորդությունները բավարարվում են։

Բացի սա, մայիսի 23-ին ստացվել է դատավորներ Ռուստամ Մախմուդյանի, Հրաչ Այվազյանի և Կարեն Ավետիսյանի ներկայացուցչի դիմումը՝ դատական նիստը հետաձգելու վերաբերյալ։ Խորհուրդը միջնորդությունը բավարարեց, նիստը հետաձգվեց։

Նշենք, որ կարգապահական պատասխանատվության ենթարկելու միջնորդություն ներկայացրել է արդարադատության նախարար Սրբուհի Գալյանը։