Ես, բնականաբար, հույս ունեմ, որ Փաշինյանին չի հաջողվի հեղաշրջում իրականացնել Մայր Աթոռում: Ես դա բացարձակապես անընդունելի եմ համարում ոչ թե այն պատճառով, որ չեմ տեսնում մեր եպիսկոպոսների եւ ընդհանրապես հոգեւորականների թերությունները:
Պարզապես այն գործընթացը, որը նախաձեռնել է վարչապետը, հակասահմանադրական է, հակապետական է եւ հակազգային: Բայց, ցանկացած երեւույթ ուսումնասիրելիս, պետք է աչքի առաջ ունենալ վատթարագույն սցենարը: Առավելագույնը, ինչին կարող է հասնել Փաշինյանը, հետեւյալն է. հեղաշրջման արդյունքում կստեղծվի «ՀՀ եկեղեցի», որը փաստացի ենթակա կլինի Հայաստանի գործադիր իշխանությանը:
Մեր երկրի քաղաքացիների մի մասը այդ եկեղեցին կընդունի, մյուսը (այդ թվում՝ ես)՝ չի ընդունի: Ես եւ իմ պես մտածողները կցանկանանք հաճախել այն տաճարները, որոնք Փաշինյանին չեն ենթարկվում եւ ավանդական՝ 1700 – ամյա եկեղեցու մասն են: Իշխանությունը կարող է արգելել այդ տաճարները եւ հետապնդել «ոչ-փաշինյանական» հոգեւորականներին: Այնպես չէ, որ նման պառակտումներ եւ նման բռնաճնշումներ մեր պատմության մեջ չեն եղել:
Բայց այսօր այդպիսի բզկտված հասարակությամբ հնարավոր չի լինելու պահպանել Հայաստանի Հանրապետությունը: Մեր ունեցած բաժանումներին՝ ներկա-նախկին, ռուսամետներ-արեւմտամետներ, հայաստանցիներ-ղարաբաղցիներ, ժողովրդասերներ-ժողովրդատյացներ կավելանա եւս մեկը՝ ավանդական եւ «փաշինյանական» եկեղեցու հետեւորդներ:
Ենթադրենք, քանակական առումով այդ բաժանումը կլինի մոտավորապես 50/50: Բայց Սփյուռքում, որտեղ ապրում է հայ հավատացյալների մեծ մասը, չեն ընդունի այդ «կոոպերատիվ եկեղեցին»՝ սփյուռքահայերի մեծ մասը, համենայնդեպս, դրա դեմ կընդվզի:
Այդպիսով, մեր ներքին պառակտման հետ մեկտեղ, կխորանա նաեւ Հայաստան-Սփյուռք անդունդը:
Հայ ժողովրդի պատմությանը դրանով, իհարկե, վերջակետ չի դրվի: Բայց հայկական պետականության մասին այս պարագայում ստիպված կլինենք մոռանալ:
Արամ ԱԲՐԱՀԱՄՅԱՆ
Նկարները ստեղծվել են 2018-ի իշխանափոխության ժամանակ՝ Նիկոլ Փաշինյանի կողմնակիցների միջոցով:
Բաց մի թողեք
«Կիրանցը գոհ է, դուք էլ թափով հանձնեք ձեր տները»․ սա՞ չէ ձեր նպատակը
Այս ընտրությունների արդյունքները չեն կարող վկայել ժողովրդավարության մասին
Մենք կարողացանք մեր փոքր դրոշակները դնել քաղաքական դաշտի մեջ