Նիկոլ Փաշինյանը Փարիզում մասնակցում է Խաղաղության 8-րդ ֆորումին: Այստեղ էլ նա առիթը բաց չի թողել եւ կրկին շնորհակալություն է հայտնել իր «կիրթ հարեւան» Ալիեւին՝ իբրեւ թե Ադրբեջանի տարածքով Հայաստան եկող բեռների հետ կապված բոլոր արգելքները հանելու համար:
Փաշինյանը եւս մեկ անգամ հայտարարել է, որ Հայաստանը պատրաստ է Թուրքիայից Ադրբեջան գնացող բեռնատարներին ճանապարհներ տրամադրել: Քաղաքագետ Հակոբ Բադալյանը «Հրապարակի» հետ զրույցում նկատեց՝ իրեն զարմացնում է հացահատիկի թեմայով այդ արձագանքների վերաբերյալ տարակուսանքը, որովհետեւ կառավարող ուժի ներկայացուցիչները Հայաստանում շատ վաղուց բարձրաձայնել են, որ ոչ միայն Ադրբեջանի տարածքով, այլեւ հենց Ադրբեջանից կարող են գազ կամ այլ էներգակիրներ կրել:
«Այս մասին հայտարարությունները հնչել են շատ վաղուց, եւ որեւէ կերպ զարմանալի չէ, որ կարող են հնչել այսպիսի մոտեցումներ՝ Ադրբեջանի տարածքով ապրանք ստանալու համար: Սակայն այստեղ խնդիրը հետեւյալն է․ ի վերջո, երբ համաշխարհային տրամաբանությունը բերում է դրան, որ հաղորդակցությունների բացումը, ապաշրջափակումը միջազգային թրենդ է եւ պահանջված է գործնականում բոլոր կամ առնվազն խոշոր խաղացողների շրջանում, այս տրամաբանությանը, այս թրենդին դեմ գնալն արդյունավետ չէ: Ամբողջ խնդիրն այն է, թե ինչ պայմաններով ենք մենք գնում ապաշրջափակման եւ ապաշրջափակմա՞ն ենք գնում արդյոք, թե ընդամենը Հայաստանին միացված հետեւյալ ծիրի կաթիլային տրամաբանությամբ ինչ-որ պրոցեսի, երբ հաղորդուղիների ապաշրջափակում ասվածը տեղի է ունենում այն տեմպով եւ այն տրամաբանությամբ, որը պետք է ոչ թե Հայաստանին, այլ պետք է Հայաստանի հանդեպ ինչ-որ նկրտումներ ունեցող ուժերին: Այս պարագայում հարց է առաջանում․ իսկ ինչո՞ւ օրակարգում չկան բոլոր հաղորդուղիների ապաշրջափակումը եւ այս հարցի լայն քննարկումը: Ինչո՞ւ հանպատրաստից խոսակցություն գնաց այդ ղազախական ցորենի վերաբերյալ, արդյո՞ք սա դարձյալ միտված չէ այդ քարոզչական տրամաբանությունը սպասարկելուն, որով Հայաստանի իշխանությանը քարտ բլանշ է տրվում՝ առաջիկա ընտրական պրոցեսում էլեկտորատին, այսպես ասենք, պրակտիկ խաղաղություն ներկայացնելու համար: Չէ՞ որ մինչեւ հիմա խոսվում է այն մասին, որ խաղաղություն է հաստատվել, բայց ներկայացվող համոզիչ ապացույցներ չկան։ Հակառակը․ հարց է տրվում, թե այդ դեպքում խաղաղության պայմանագիրն ինչու ստորագրված չէ»,-ասաց Բադալյանը:
Քաղաքագետը չի բացառում, որ առաջիկայում, ընտրական պրոցեսին զուգահեռ, կլինեն որոշակի քայլեր, որոնք թույլ կտան պաշտոնական Երեւանին խոսել այն մասին, որ պրակտիկ իմաստով խաղաղությունը հաստատվում է, այն վերածվում է որոշումների եւ այլն: Եվ այս կոնտեքստում քաղաքագետը շեշտում է՝ պետք է հարց բարձրացնել՝ եթե դա այդպես է, ապա ինչո՞ւ խոսք չկա բոլոր հաղորդուղիների ապաշրջափակման մասին, այլ ընդամենը կաթիլային սկզբունքով Հայաստանի հանդեպ որոշումներ են կայացվում:
Բաց մի թողեք
21 հոգևորականներին նույն ժամին հարցաքննության կանչած քննիչը էլ ընթացք չի տալիս գործին. Լուսանկար
Հրաժեշտ՝ բիբլիական Արարատին. որոշումն ուժի մեջ մտավ. Լուսանկար
Հոգեւորականների եւ նրանց ընտանիքի անդամների իրերը «պատանդ են պահվում»