Հարցազրույց «Հայաստան» դաշինքի պատգամավոր Գառնիկ Դանիելյանի հետ
– Մարդու իրավունքների նախկին պաշտպան, «Միասնության թեւեր» շարժման ղեկավար, քաղաքական հայտ ներկայացրած Արման Թաթոյանն ասուլիս տվեց եւ հայտարարեց, որ եթե իսկապես ուզում ենք, որ Նիկոլ Փաշինյանը պարտվի, ապա պաշտոնաթող նախագահները չպետք է մասնակցեն 2026 թվականի ընտրապայքարին։ Թաթոյանը ո՛չ առաջինն է, ո՛չ էլ միակը, նրանից առաջ էլ մի շարք քաղաքական գործիչներ այս դիրքորոշումն են հայտնել: Դուք ի՞նչ պատասխան ունեք այս մարդկանց։
– Այն մարդիկ, որոնք Նիկոլ Փաշինյանին քննադատելու կամ իր գործելաոճը դատապարտելու եւ նաեւ ջանքերը մեկտեղելու ծրագիր ունեն, որ նրան հեռացնեն, չպետք է զբաղվեն նրանով, որ ընդդիմության մյուս հատվածի վրա փորձեն ստվեր գցել։ Մենք նման գործելաոճով հանդես չենք գալիս ու չենք գալու, պետք չէ թիրախավորել, բոլորն ազատ են ու իրենք են որոշում` ինչով զբաղվել։ Ի՞նչ պիտի անեն, օրինակ, ընդդիմադիրները, փակե՞ն իրենց կուսակցությունները։
– Խոսքը նախագահների մասին է, որ չզբաղվեն քաղաքականությամբ, չմասնակցեն առաջիկա ընտրություններին։
– Բայց նախագահ Ռոբերտ Քոչարյանն այսօր խորհրդարանի ամենամեծ «Հայաստան» դաշինքի առաջնորդն է, այդ դաշինքը գոյություն ունի, աշխատում է գետնի վրա, հիմա դուք ճի՞շտ եք համարում, որ ինչ-որ մեկն ասի, թե քաղաքական դաշտից ինչ-որ մեկը թող հեռանա։ Անլուրջ է։ Եթե մտնենք այդ դաշտ, ամեն մեկն էլ իր ճաշակով կարող է մյուսին ասել, որ պիտի հեռանա, ու ընդդիմությունը, իր բանուգործը թողած, կզբաղվի դրանով։
– Այսինքն՝ ասվածի մեջ ճշմարտության հատիկ չե՞ք տեսնում, որ այս իշխանությունը նախկին նախագահների ատելության քարոզչությամբ է եկել իշխանության, ու մի ստվար զանգված․․․
– Հիմա մեզ մոտ 300 հազար մարդ քվե է տվել, այդ մարդկանց ասենք․․․ ի՞նչ ասենք այդ մարդկանց, որ մեր աջակիցներն են ու մեզ քվե են տվել, ասենք, որ դո՞ւրս ենք գալիս քաղաքականությունից, ո՞րն է դրա ճշմարտությունը։ Նույն սոցիոլոգիական հարցումներով, այսօր մենք բարձր վստահություն ունենք, ի՞նչ ասենք մեր աջակիցներին, ասենք՝ չէ, գնացեք տներով, մի՞ մասնակցեք ընտրական պրոցեսներին կամ` մի մասնակցեք այլ պրոցեսների։ Եթե մարդն ուզում է մասնակցել քաղաքական պրոցեսներին, խնդրեմ, ոչ մեկին իրավունք չունենք ասելու՝ սա պետք է մասնակցի, սա` չպետք է։ Թող այդ մարդիկ զբաղվեն իրենց գործերով, զբաղվեն իրենց թիմերի ձեւավորմամբ, շտաբային գործունեությամբ, քաղբանտարկյալների հարցով, երկրում կոռուպցիայի, ապօրինությունների դեմ պայքարի հարցով, լիքը բաներ կան զբաղվելու, թող գնան ու զբաղվեն։
– Զբաղվում են, բայց մեկը մյուսին չի խանգարում։
– Դե, թող զբաղվեն, մեզ հետ ի՞նչ գործ ունեն։
– Դուք եք տիտղոսակիր ընդդիմությունը, որը չկարողացավ իշխանություն փոխել, փոխարենը իշխանության համար «գանձ ընդդիմություն» եք դարձել, իրենք էլ են սկսել բարձրաձայնել, որ քանի Քոչարյանն ու Սարգսյանը կան, մենք կմնանք իշխանության։
– Անլուրջ է, անլուրջ։
– Ի՞նչն է անլուրջ։
– Ամեն ինչն անլուրջ է, եթե ինչ-որ մեկն ուզում է քաղաքական հայտ ներկայացնել, թող ներկայացնի, զբաղվի իր կուսակցաշինության գործով, ժողովրդի հետ աշխատելով, իշխանությունների ապօրինությունները վեր հանելով, իր էլեկտորատի հետ աշխատելով։ Հայաստանի Հանրապետության նախագահները հաղթանակած նախագահներ են՝ Լեւոն Տեր-Պետրոսյանն էլ, Սերժ Սարգսյանն էլ, Ռոբերտ Քոչարյանն էլ, եւ ոչ մեկն իրավունք չունի վաստակ ունեցող մարդկանց ասել, որ իրավունք չունեն մասնակցելու կամ չմասնակցելու։
– Ինչո՞ւ են այդ դեպքում կրկնվում նման հայտարարությունները․․․
– Ի՞նչ իմանամ` ինչու, մարդ է՝ քնից հելել է, ասում է, գնա իրեն հարցրու՝ ինչի՞ ես ասում: Թող գնա գործով զբաղվի։ Նախագահներից ամեն մեկն իր էլեկտորատն ունի, իր աջակիցները, իր ընտրազանգվածը: Ինչքա՞ն կարելի է ասել։
– Իսկ գուցե հարցին այլ անկյունի՞ց նայենք, ի՞նչ եք կարծում` նախագահներն ինչո՞ւ վճռական պահերին չեն համախմբվում, իրար կողքի կանգնում՝ իշխանությանը հեռացնելու պայքարում, նրանք պառակտված են․․․
– Ի՜նչ պառակտում, թողեք՝ մարդիկ իրենք որոշեն, պետք չի մտնել նախագահների արանքը, էս հայտարարություններն են հենց պառակտում, թե մեկը պիտի մասնակցի, մյուսը՝ չէ, քավ լիցի, թող ամեն մեկն էլ մասնակցի, իրա գործը դնի, էդ տարիների ընթացքում գլխից վերեւ աշխատանք կա անելու, դուք ինձ դրդում եք, որ ես նման մարդկանց գնահատական տամ, չեմ տա, որովհետեւ համաձայն չեմ, դա լավ տեղ չի տանում, ջրաղացին ջուր է լցնում։
Բաց մի թողեք
Տարիներ առաջ ո՞վ կարող էր պատկերացնել, որ մենք հասնելու ենք այս վիճակին
Ով է «Ճապ»-ը, կրիմինալ անցյալը, կապը ՔՊ-ական նախկին քաղաքապետուհու հետ
71,8 մլն դրամ լրացուցիչ ֆինանսավորում է եղել Արսեն Թորոսյանի օրոք՝ առանց փաստացի ծառայության․ կոռուպցիայի մաս 7