Հակամարտությունը երբեք չի ավարտվի Իրանի կապիտուլյացիայով․ Ղալիբաֆ

Իրանը չի դադարեցրել իր տարածքը պաշտպանելու նախապատրաստությունները և պատրաստ է լիարժեք պաշտպանության, եթե ԱՄՆ-ն խախտի համաձայնագրերը,հայտարարել է Իսլամական Հանրապետության Մեջլիսի խոսնակ Մոհամմադ Բաղեր Ղալիբաֆը։

«Բանակցությունների ընթացքում ես ԱՄՆ փոխնախագահին հստակեցրեցի, որ մենք նրանց նկատմամբ բացարձակապես վստահություն չունենք։ Իմ կարծիքով, միայն նրանք, ովքեր պատրաստ են պատերազմի, կարող են բանակցել ԱՄՆ-ի հետ։ Հետևաբար, մենք երբեք չենք դադարեցրել մեր երկիրը պաշտպանելու նախապատրաստությունները։ Հենց որ ամերիկացիները խախտեն ձեռք բերված համաձայնագրերը, մենք պատրաստ կլինենք լիարժեք պաշտպանության, վճռականորեն կդիմադրենք դրանց և կապահովենք, որ Իրանի ժողովրդի իրավունքները հարգվեն», – ասել է Ղալիբաֆը Ինդոնեզիայի Ժողովրդական Խորհրդակցական Ժողովի (երկպալատ խորհրդարան) նախագահ Ահմադ Մուզանիի հետ հանդիպումից հետո իր Telegram ալիքում հրապարակված հայտարարության մեջ։

Նա ընդգծել է, որ պատերազմի ավարտը «առաջնահերթություն է բոլոր երկրների համար», բայց հավելել է, որ «այս հակամարտությունը երբեք չի ավարտվի Իրանի կապիտուլյացիայով»։

Չորեքշաբթի գիշերը ԱՄՆ զինված ուժերը մի շարք հզոր հարվածներ են հասցրել Իրանին։ ԱՄՆ կենտրոնական հրամանատարությունը հայտարարել է, որ սա պատասխան է եղել Հորմուզի նեղուցով անցնող առևտրային նավերի դեմ Իրանի գործողություններին։ Իրանի զինված ուժերը հայտնել են Բահրեյնում և Քուվեյթում գտնվող ամերիկյան բազաների դեմ պատասխան հարվածների մասին, իսկ Իրանի իշխանությունները մեղադրել են Վաշինգտոնին հրադադարի համաձայնագիրը խախտելու մեջ։