Մոսկվան և Վաշինգտոնը «խաղաղության ծրագրի ուկրաինական խմբագրումը» չեն ընդունի

«Ուոլ սթրիթ ջոռնելին» հայտնի է դարձել, որ Միացյալ Նահանգները եվրոպացի գործընկերներին ներկայացրել է Ռուսաստանը «համաշխարհային տնտեսություն վերադարձնելու ծրագիր»:

Այդ մասին հաղորդում է ռուսաստանյան «Կոմերսանտը», որի ներկայացմամբ «ամերիկյան առաջարկությունները շարադրված են երկու առանձին էջով»:

Վաշինգտոնը եվրոպացիներին առաջարկում է ռուսական սառեցված ակտիվներից 200 միլիարդ դոլար հատկացնել Ուկրաինայի տնտեսական վերականգնմանը:

Փաստաթղթում խոսվում է Ուկրաինայում «տվյալների մշակման խոշոր կենտրոն» ստեղծելու մասին՝ առանց կոնկրետացման, թե ինչ նպատակի պետք է ծառայի այդ «հաստատությունը»:

Երկրորդ փաստաթղթով ԱՄՆ-ը եվրոպացիներին տեղեկացրել է Ռուսաստանի տնտեսության տարբեր ճյուղերում ամերիկյան ընկերությունների կողմից ներդրումների մասին: Խոսքը, մասնավորապես, վերաբերում է հազվագյուտ մետաղների և Արկտիկայում էներգակիրների հանքավայրերի շահագործմանը:

Երկու փաստաթղթերն էլ, ըստ ամերիկյան լրատվամիջոցի, ներկայացվել են որպես ուկրաինական կարգավորման «ծրագրի տնտեսական հավելվածներ»: Պարբերականին հայտնի է դարձել, որ եվրոպացի մի բարձրաստիճան պաշտոնյան այդ ծրագիրը համեմատել է «Գազայում Ռիվիերա ստեղծելու Թրամփի երևակայության հետ»:

Դեկտեմբերի 10-ին Ուկրաինայի նախագահ Զելենսկին հանդիպել է Գերագույն ռադայի մի խումբ պատգամավորների եւ խոսել նախագահական ընտրություններ անցկացնելու հավանականությունից:

Նա ասել է, որ գործընկեր երկրների հետ քննարկում է քվեարկության համար անհրաժեշտ անվտանգություն ապահովելու հարցը, բայց «իրավական լուծումները պետք է գտնվեն երկրում»:

Ավելի վաղ Զելենսկին հայտարարել է, որ Ռուսաստանը պետք է կրակը դադարեցնի, որպեսզի առաջիկա 60-90 օրերի ընթացքում նախագահական ընտրություններ անցկացվեն:

Ռուսաստանի արտաքին գործերի նախարարության պաշտոնական ներկայացուցիչ Մարիա Զախարովան Զելենսկուն մեղադրել է «ծուղակներ լարելու» մեջ: Նա ասել է, որ միջազգային պրակտիկայում չգիտի նման դեպք, երբ «իր երկրում ընտրություններ անցկացնելու համար որևէ առաջնորդ մեկ այլ երկրի պահանջներ ներկայացնի»:

Դեկտեմբերի 10-ին Ուկրաինան միաժամանակ Վաշինգտոնին ներկայացրել է կարգավորման իր տարբերակը, որ համաձայնեցված է եվրոպական «եռյակի»՝ Մեծ Բրիտանիայի, Ֆրանսիայի և Գերմանիայի հետ: Ամենայն հավանականությամբ, Մոսկվան և Վաշինգտոնը «խաղաղության ծրագրի ուկրաինական խմբագրումը» չեն ընդունի:

Ուկրաինայի Զինված ուժերի գլխավոր հրամանատար Սիրսկին նույն օրը հայտարարել է, որ «ռազմաճակատում դրությունը բարդ է, բայց՝ կառավարելի»: Իսկ կարգավորման դիվանագիտական հնարավորությունը շատ փոքր է: