Ի պատասխան 2024 թվականի ապրիլի 30-ին Ազգային Ժողովում պատգամավոր Տիգրան Աբրահամյանի հնչեցրած հայտարարության՝ Կադաստրի կոմիտեն հայտնել է, որ 2022թ․-ին վերջինիս մատնանշած նյութերը, հանդիսանալով քարտեզագրագեոդեզիական ֆոնդի մաս, գտնվել են Կադաստրի կոմիտեում։
«Նյութերը նշահարված են եղել «գաղտնի» դրոշմակնիքով, ուստի 2022թ․-ին ԱԺ պատգամավոր Հայկ Մամիջանյանի հարցմանն ի պատասխան՝ հայտնել էինք, որ նյութերը տրամադրման ենթակա չեն, և դրանց հնարավոր է ծանոթանալ միայն տեղում (այսինքն՝ Կադաստրի կոմիտեում)՝ սահմանված ընթացակարգով դիմելու պարագայում, որից հետո Հայկ Մամիջանյանից Կադաստրի կոմիտեն այլ հարցում չի ստացել։
2023 թվականին գաղտնագրված նյութերը սահմանված ընթացակարգով փոխանցվել են Պաշտպանության նախարարությանը:
2024թ․ ԱԺ պատգամավոր Տիգրան Աբրահամյանին հայտնել ենք, որ նյութերը Կադաստրի կոմիտեում առկա չեն, իսկ առկա նյութերի բովանդակությանը և նախկինում իրականացված աշխատանքներին ավելի մանրամասն ծանոթանալու համար հրավիրել ենք Կադաստրի կոմիտե։
Պարոն Աբրահամյանը չի արձագանքել հրավերին։
Միաժամանակ հայտնում ենք, որ Կադաստրի կոմիտեում որևէ արխիվային նյութ չի ոչնչացվել»,- ասված է Կոմիտեի հաղորդագրության մեջ:
Ապրիլի 30-ին՝ ԱԺ-ում հայտարարությունների ժամին, «Պատիվ ունեմ» խմբակցության պատգամավոր Տիգրան Աբրահամյանը հայտարարել էր, թե Սովետական ժամանակաշրջանի սահմանազատման, սահմանագծման աշխատանքների վերաբերյալ վերջին ակտը՝ «Հայկական ԽՍՀ և ադրբեջանական ԽՍՀ առանձին հողօգտագործողների միջև սահմանների ճշգրտման մասին» 1988 թ․արձանագրությունը, որը 2022 թվականին պահվել է Կադաստրի կոմիտեում, այս պահին արդեն առկա չԷ, փաստաթղթերն ու քարտեզները այլևս գոյություն չունեն:
Բաց մի թողեք
«Զանգեզուրի միջանցքը» կեղծ է, նման պատրանքներին հետևողների համար հետևանքները ծանր կլինեն. Էբրահիմ Ազիզի
Դա խոչընդոտ կհանդիսանա ՀՀ-ի ԵՄ անդամակցության ճանապարհին․ Սարգսյան
Պավել Դուրովն անդրադարձել է Ֆրանսիայում իր դեմ իրականացվոսղ գործողություններին