Նիկոլ Փաշինյանն անդրադարձել է պաշտոնյաների ազատումներին

Նիկոլ Փաշինյանը Կառավարության նիստի մեկնարկին անդրադարձավ կադրային փոփոխություններին։

«Մեր նախորդ նիստից ի վեր կադրային որոշակի իրադարձություններ են տեղի ունեցել: Խոսքը Հակակոռուպցիոն կոմիտեի նախագահ Սասուն Խաչատրյանի, Քննչական կոմիտեի նախագահ Արգիշտի Քյարամյանի, ՊԵԿ նախագահ Ռուստամ Բադասյանի, ԲԴԽ նախագահ Կարեն Անդրեասյանի, ՆԳ նախարար Վահե Ղազարյանի, ՏԿԵ նախարար Գնել Սանոսյանի մասին է, և այսօր առավոտ նախարարությունում ներկայացրել եմ նորանշանակ նախարարներին՝ Արփինե Սարգսյանին և Դավիթ Խուդաթյանին, որոնք արդեն Կառավարության նիստին մասնակցում են»,- ասաց Փաշինյանը՝ շնորհակալություն հայտնելով աշխատանքից ազատված պաշտոնյաներին և շնորհավորելով նորանշանակ նախարարներին։

Օրերս Նիկոլ Փաշինյանը տեղեկացրել էր, որ մի շարք բարձրաստիճան պաշտոնյաների խնդրել է թողնել իրենց զբաղեցրած պաշտոնները: