«Իրանը ձգտում է Հայաստանի և Ադրբեջանի միջև խաղաղության հաստատմանն ու պատրաստ է օգնել»,- Թեհրանում հայտարարել է Իրանի ԱԳ նախարար Աբաս Արաղչին՝ ՌԴ արտգործնախարար Սերգեյ Լավրովի հետ համատեղ ասուլիսում: Իրանն առաջին անգամ չէ, իհարկե, որ հայտնում է հայ-ադրբեջանական խաղաղությամբ իր շահագրգռությունն ու օգնելու պատրաստակամությունը, սակայն Լավրովի հետ հանդիպումից հետո համատեղ ասուլիսի ընթացքում այդ արձանագրումը, բնականաբար, գրավում է առավել ուշադրություն:
Համենայն դեպս, հարց է առաջացնում, թե արդյո՞ք քննարկվել է Իրանի որևէ դերակատարում: Այն, որ քննարկվել է Հայաստանի և Ադրբեջանի միջև իրավիճակը և հնարավոր հեռանկարները, անշուշտ, վեր է կասկածից:
Տվյալ պարագայում հարցն այն է, թե արդյոք այդ քննարկումը ենթադրել է որևէ կոնկրետ գործողության դիտարկում, այդ թվում՝ Իրանի մասնակցությամբ կամ դերակատարումով: Թե՞ խոսքն այն մասին է, որ Իրանից ակնկալվում է «ճկունություն» ճանապարհների ապաշրջափակման օրակարգի առնչությամբ:
Լավրովը Թեհրան է մեկնել Անկարայից, ուր փետրվարի 24-ին բանակցել է արտգործնախարար Ֆիդանի և նախագահ Էրդողանի հետ: Ֆիդանի հետ համատեղ ասուլիսից հետո Լավրովը հայտնել էր, որ քննարկել են ռեգիոնալ հարցերի շրջանակը, հատկապես ուշադրության են արժանացրել կապուղիների ապաշրջափակումը:
Թե հատկապես ինչ շեշտադրումով կամ ինչ դիտանկյունով, Լավրովը չի մանրամասնել: Մանրամասները, իհարկե, նա ներկայացրած կլինի Թեհրանում: Երբ Իրանը հայտարարում է, որ պատրաստ է օգնել հայ-ադրբեջանական խաղաղությանը, դա, իհարկե, հնչում է բազմիմաստ:
Մի կողմից այդ հայտարարությունը կարող է մեկնաբանվել, որ Թեհրանը պատրաստ է ճկունություն ցուցաբերել առանցքային՝ ճանապարհների ապաշրջափակման հարցում, մյուս կողմից, սակայն Իրանի հայտարարությունը կարող է նշանակել, որ Թեհրանն ունի իր մոտեցումները և պատրաստ է դրանց գործադրմամբ ապահովել խաղաղ գործընթացի առաջխաղացում, միաժամանակ չնահանջելով իր «կարմիր գծերից»:
Տվյալ պարագայում էական կլինի այն, թե Մոսկվան և Անկարան՝ միասին կամ առանձին-առանձին, կօժանդակեն Իրանի այդ պատրաստակամությանը, թե՞ ոչ:
Ի վերջո, Իրանը ավելի շատ կամ շուտ Հայաստանին կաջակցի, թե կկատարի Լավրովի պահանջները ․․․
Բաց մի թողեք
Խաղաղության պայմանագրի ստորագրումը ինչ կտա Ադրբեջանին, իսկ Հայաստանի՞ն ․․․
Հայաստանի հանրությունը վերջը միայնակ է մնալու պատերազմի պայմաններում, առայժմ քնած ենք
Հայստանի մարդասիրական օգնությունը Սիրիային՝ Թուքիայով։ Պատրվակ կլինի, որ բացվի սահմանը