Վաշինգտոնը Եվրոպայի անվտանգությունը վերանայել է, այն միայն ԵՄ-ին չի թողնի

ԱՄՆ Կոնգրեսի Ներկայացուցիչների պալատը հաստատել է եկող տարվա ազգային պաշտպանության ռազմական բյուջեն: Այն կազմում է 900 միլիարդ դոլար, որից 800 միլիոնը նախատեսվում է ծախսել «օգնություն Ուկրաինային» առանձին տողով:

Այդ մասին հաղորդում է «Գարդիանը», որի դիտարկմամբ՝ Սենատին ներկայացվող օրինագիծը «ուժեղ շեշտադրում է եվրոպական անվտանգության ապահովումը»:

Պարբերականի ներկայացմամբ, օրինագիծն «արգելում է Եվրոպայում ամերիկյան զորքերի թվաքանակը կրճատել 76 հազար զինծառայողներից ցածր մակարդակի, ինչպես նաև արգելափակում հիմնական սարքավորումների դուրսբերումը»:

Ներկայացուցիչների պալատի հանրապետական խոսնակ Մայք Ջոնսոնը քվեարկությունից առաջ հայտարարել է, որ «նախագահ Թրամփը և Կոնգերսի հանրապետականներ վերականգնում են Ամերիկայի ուժը, պաշտպանում մեր հայրենիքը, աջակցում մեր դաշնակիցներին և ապահովում, որպեսզի Միացյալ Նահանգները մնա ամենահզոր և կարողունակ ռազմական ուժը, որ երբևէ աշխարհում եղել է»:

Այս քվեարկությունը փորձագետների ուշադրության կենտրոնում է այն իմաստով, որ վերջերս Միացյալ Նահանգներն ընդունել է ազգային անվտանգության նոր հայեցակարգ, որտեղ Եվրամիության համար կանխատեսվում է «քաղաքակրթական վախճան»:

Գրեթե բոլոր մենկաբանները տպավորություն են փոխանցել, որ Թրամփը «լքում է Եվրոպան»: Հատկապես հեռու գնացող եզրակացություններ են տարածվել ռուսաստանյան մամուլում:

Bloomberg-ը գրել է, որ եվրոպական առաջնորդները «դեռեւս հույս ունեն, որ Թրամփը կհամաձայնի ուկրաինական պատերազմի հարցում իրենց տեսակետին»:

ԱՄՆ եկող տարվա պաշտպանության ռազմական բյուջեի մասին օրինագիծը, կարծես, վկայում է, որ Վաշինգտոնը Եվրոպայի անվտանգությունը միայն Եվրամիության անդամ պետությունների պատասխանատվությանը թողնելու դիրքորոշումը գոնե սկզբունքային առումով վերանայել է:

Կարևոր է, որ Կոնգրեսը Պենտագոնին արտոնում է մինչև 2029 թվականը տարեկան ևս 400 միլիոն դոլարի օգնություն ցուցաբերել Ուկրաինային: Ճիշտ է, այդ գումարն առանձնացված չէ, բայց ԱՄՆ պատերազմի նախարարությունը կարող է իր միջոցների հաշվին Ուկրաինայի պաշտպանունակության ամրապնդման ծախսեր իրականացնել:

Դժվար է ասել, որ ռազմական բյուջեի մասին օրենքի քվեարկությունը կարող է անդրադառնալ Ուկրաինայի հարցում Դոնալդ Թրամփի դիրքորոշմանը: ԱՄՆ նախագահի հատուկ ներկայացուցիչ Քիթ Քելլոգը, ով եկող տարեսկզբին հրաժեշտ կտա պաշտոնին, ասել է, որ Ուկրաինայում «կրակի դադարեցումը մոտ է»:

Ռուսաստանի արտաքին գործերի նախարար Լավրովը նույն օրը հայտարարել է, որ Մոսկվան «ծանոթ չէ Ուկրաինայի կողմից Վաշինգտոն ներկայացված փաստաթղթին և սպասում է ազդակի»: