Եվրամիությունը Բաքվին ավելի առարկայական «գործարք» է առաջարկում

Եվրոպայի ժողովրդավարական համայնքի և ԵՄ-Հայաստան գագաթաժողովին ընդառաջ Եվրահանձնաժողովը վերջնականապես համաձայնեցրել է Ուկրաինային 90 միլիարդ եվրո վարկի տրամադրումը:

Հունգարիան և Սլովակիան «վետոն հանել» են, երբ Ուկրաինան վերականգնել է այդ երկրներին «Դրուժբա» խողովակաշարով ռուսաստանյան նավթի մատակարարումը: Եվրահանձնաժողովը նաև հաստատել է Ռուսաստանի դեմ պատժամիջոցների քսաներորդ փաթեթը:

Ի՞նչ նոր սահմանափակումներ են կիրառվելու ՌԴ նկատմամբ, առայժմ մանրամասնություններ հատնի չեն:

Բաքվի իշխանական մամուլը հայտնել է, որ Եվրահանձնաժողովը «ադրբեջանական հինգ լցանավերի նկատմամբ կիրառված պատժամիջոցները հանել» է: Խոսքը «վարձակալությամբ այլ երկրների հանձնած» լցանավերի մասին է, որ ԵՄ կողմից ենթարկվել են պատժամիջոցների՝ Ռուսաստանի «ստվերային նավատորմի» մաս կազմելու և նավթի ապօրինի արտահանում իրականացնելու համար: Ակնհայտ է, որ Եվրահանձնաժողովի այդ որոշումը քաղաքական է:

Բաքվի իշխանական haqqin.az-ը, հղելով ուկրաինական լրատվամիջոցին, գրել է, որ Վլադիմիր Զելենսկին «պատրաստվում է այցելել Ադրբեջան»: Մյունխենի անվտանգության խորհրդաժողովում կայացել է Ադրբեջանի և Ուկրաինայի նախագահների հանդիպում:

Վերջերս Վլադիմիր Զելենսկին այցելել է Թուրքիա: Ըստ տեղեկությունների, Թուրքիան և Ուկրաինան «ռազմական արդյունաբերության ոլորտում համագործակցության պայմանագիր են քննարկում»:

Ապրիլի 23-ին Ուկրաինայի նախագահը հայտարարել է, որ ծրագրում է «համագործակցել Կովկասի հետ»: Ըստ երևույթին, խոսքը Ադրբեջանի մասին է, որ, սակայն, ապրիլի 15-ին Ռուսաստանի հետ վերականագնել է ռազմավարական դաշնակցային գործընկերությունը: Զելենսկին ասել է, որ Ուկրաինան «ոչ միայն դրոններ է առաջարկում, այլև պաշտպանության լիարժեք համակարգ»:

Ադրբեջանի հակաօդային պաշտպանության միջոցները խորհրդային-ռուսաստանյան և իսրայելական են: Պարսից ծոցի արաբական երկրների դեմ Իրանի հրթիռային և դրոնային հարձակումները բացահայտել են ամերիկյան ՀՕՊ համակարգերի ոչ այնքան բարձր արդյունավետությունը:

Նույնը կարելի է ասել իսրայելական «Երկաթե գմբեթի» մասին: Եթե Ադրբեջանը ընդունի Զելենսկու առաջարկությունը, ապա կնշանակի, որ Իրանից դրոնային հարձակման ենթարկվելու մտավախություն ունի:

Բայց Ուկրաինա-Ադրբեջան անվտանգային համագործակցությունը կարող է աշխարհաքաղաքական ենթատեքստ ունենալ: Ըստ երևույթին, ադրբեջանական «ստվերային նավատորմի» լեգալացմամբ Եվրամիությունը Բաքվին ավելի առարկայական «գործարք» է առաջարկում: