Միացյալ Նահանգները դադարեցրել է ներգաղթային վիզաների դիմումների ընդունումը

ԱՄՆ նախագահ Դոնալդ Թրամփի վարչակազմը կասեցրել է ամբողջ աշխարհում ներգաղթային վիզաների դիմումների մշակումը՝ հյուպատոսական աշխատակիցներին վերապատրաստելու համար, որպեսզի նրանք կարողանան զտել կառավարության հնարավոր օգնության կարիք ունեցող դիմորդներին, հաղորդում է Financial Times-ը (FT)՝ հղում անելով իր աղբյուրներին։

«Պետդեպարտամենտը մեկնարկել է «գլոբալ վերապատրաստման նախաձեռնություն»՝ ապահովելու համար, որ հյուպատոսական պաշտոնյաները կարողանան «համապարփակ և հետևողականորեն գնահատել յուրաքանչյուր դիմորդի», – հրատարակությանը հայտնել է Պետդեպարտամենտի խոսնակը:

Գերատեսչությունը հավելել է, որ «վիզաների դիմորդները չպետք է դառնան պետական բեռ, ինչպես սահմանված է ԱՄՆ օրենքներով և կանոնակարգերով, և չպետք է կախված լինեն կարիքավոր ամերիկացիների համար նախատեսված պետական նպաստներից»:

Ըստ FT-ի, ներգաղթային վիզայի դիմորդները, որոնք հարցազրույցներ էին նշանակել ԱՄՆ դեսպանատներում և հյուպատոսություններում, էլեկտրոնային նամակներ են ստացել, որոնցով տեղեկացվել են հետաձգված հանդիպումների մասին:

Նրանց նաև տեղեկացվել է, որ նոր հանդիպումների ամսաթվերը կհայտարարվեն ավելի ուշ: Պետդեպարտամենտը չի հայտարարել, թե երբ կվերսկսվեն ներգաղթային վիզայի հանդիպումները:

Հունվարին Պետդեպարտամենտը կասեցրել էր ներգաղթային վիզաների տրամադրումը 75 երկրների քաղաքացիներին, այդ թվում՝ հայերին:

Սահմանափակումների ենթակա երկրների ցանկում ներառված են Ռուսաստանը, Ադրբեջանը, Հայաստանը, Բելառուսը, Բրազիլիան, Վրաստանը, Եգիպտոսը, Իրանը, Ղազախստանը, Ղրղզստանը, Կուբան, Սիրիան և Ուզբեկստանը:

Ինչպես Պետդեպարտամենտը նախկինում հայտնել էր, իշխանությունները կասեցրել են ներգաղթային վիզայի գործընթացը՝ կանխելու համար նրանց ապագա մուտքը, ովքեր հետագայում կարող են «բեռ» դառնալ ամերիկյան ժողովրդի համար:

Անցյալ շաբաթ Նյու Յորքի շրջանային դատարանը չեղյալ հայտարարեց Թրամփի կողմից 75 երկրներից ներգաղթյալների դիմումների ընդունման արգելքը։