Բելառուսն արգելել է «Արամե» կոնյակի ներմուծումը

Բելառուսն արգելել է Հայաստանից և Վրաստանից կոնյակի երկու ապրանքանիշի ներմուծումը։ Այդ երկիրն ընդլայնել է մանրածախ առևտրի կետերում վաճառքի համար արգելված ալկոհոլային արտադրանքի ցանկը։

Վտանգավոր ապրանքների ռեեստրում ներառվել են վրացական ութամյա «Պոգրեբ Շիո» (Pogreb Shio) կոնյակը և հայկական յոթամյա «ԱՐԱՄԵ» (ARAME) կոնյակը, որն արտադրվում է «ՄԱՊ» ՓԲԸ-ի կողմից։

Երկու դեպքում էլ փորձագետները հայտնաբերել են նույն խախտումը՝ տանինների պարունակությունը զգալիորեն ցածր է եղել սահմանված նորմայից։

Մասնավորապես, վրացական կոնյակում այդ ցուցանիշը կազմել է 0,12 գ/դմ³, իսկ հայկական կոնյակում՝ 0,16 գ/դմ³, ինչը զգալիորեն ցածր է պահանջվող նվազագույն ստանդարտից՝ 0,3 գ/դմ³-ից։