20/05/2024

Ռուսաստանը Ղազախստանից բենզին է խնդրում

Ռուսաստանը Ղազախստանին խնդրել է «պատրաստ լինել 100 հազար տոննա բենզին մատակարարել իրեն դեֆիցիտի դեպքում, որն ավելի է խորացել ուկրաինական անօդաչուների հարձակումների և աշխատանքի ընդհատումների պատճառով»: Այս մասին հայտնում է Reuters-ը։

Աղբյուրներից մեկն ասել է, որ Ռուսաստանի համար պաշարներն օգտագործելու գործարքն արդեն համաձայնեցված է։ Աղբյուրների խոսքով՝ Մոսկվան Ղազախստանին խնդրել է ստեղծել 100 հազար տոննա բենզինի վթարային պաշար՝ պատրաստ մատակարարելու Ռուսաստան։

Ղազախստանի և Ռուսաստանի էներգետիկայի նախարարությունների ներկայացուցիչներն այս կապակցությամբ որևէ մեկնաբանություն չեն տվել, նշում է Reuters-ը։

Դեֆիցիտի պատճառ է դարձել բենզինի արտադրության կրճատումը՝ Ռուսաստանում նավթավերամշակման գործարաններին ուկրաինական անօդաչուների մի քանի բարեհաջող հարվածներից հետո: Մարտի երեք շաբաթվա ընթացքում ռուսական նավթավերամշակման գործարանները 10%-ով կրճատել են ավտոմոբիլային վառելիքի արտադրության ծավալները։ Օրսկ քաղաքի մեկ այլ նավթավերամշակման գործարան դադարեցրել է արտադրությունը ապրիլի 7-ի ջրհեղեղի պատճառով։