«Առաջիկա համայնքի ղեկավարների ընտրությունների նախապատրաստական աշխատանքներն իշխանության ներսում վստահվել են հիմնականում ՔՊ-ականներ Գևորգ Պապոյանին և Դավիթ Խուդաթյանին։
«Ժողովուրդ» օրաթերթը գրում է. Իշխանական մեր աղբյուրները փոխանցում են, որ վերջիններս գրեթե ամեն օր, այդ թվում՝ շաբաթ և կիրակի օրերին, այցելում են տարբեր մարզեր և հանդիպումներ անցկացնում ՔՊ-ի տեղական ակտիվի ու համայնքային ներկայացուցիչների հետ։
Մեր աղբյուրների փոխանցմամբ՝ Պապոյանն ու Խուդաթյանը վերջին շրջանում եղել են Գեղարքունիքի, Կոտայքի, Սյունիքի, Լոռու և այլ մարզերում, որտեղ առաջիկայում նախատեսված են համայնքային ընտրություններ։ Հանդիպումները հիմնականում փակ ձևաչափով են։ Նրանց նպատակն է տեղում հասկանալ, թե ՔՊ-ի համար որ թեկնածուներն ունեն հաղթելու առավել մեծ շանսեր, ինչ տրամադրություններ կան համայնքներում և ում շուրջ կարող է իշխանությունը ձևավորել ընտրական թիմը։
Իշխանական մեր աղբյուրների փոխանցմամբ՝ մարզերից ստացված տեղեկությունները Պապոյանն ու Խուդաթյանը պարբերաբար զեկուցում են Նիկոլ Փաշինյանին։ Իսկ ՔՊ վարչության առաջիկա նիստերի ընթացքում հենց նրանք պետք է ներկայացնեն այն թեկնածուներին, որոնց ընտրությունը, իշխանության հաշվարկով, կարող է ՔՊ-ին ապահովել առավել ուժեղ արդյունք։
Հիշեցնենք, որ ՔՊ-ի ներսում նախկին խորհրդարանական ընտրությունների արդյունքների պատասխանատվության համատեքստում Նիկոլ Փաշինյանը քննադատել էր ԱԺ պատգամավոր Արայիկ Հարությունյանին, որը ղեկավարում էր ՔՊ-ի նախընտրական շտաբը։ Այս անգամ, ըստ «Ժողովուրդ» օրաթերթի իշխանական մեր աղբյուրների, Փաշինյանը ընտրական գործընթացի մարզային կազմակերպչական պատասխանատվությունը փաստացի փոխանցել է Պապոյանին և Խուդաթյանին»։
Բաց մի թողեք
Առաջ կաշառք էին վերցնում, հիմա տարբեր երկրներից են փողեր ստանում
Վանաձորի համայնքապետի ընտրությունները կարող են տեղափոխվել 2027 թվական․ իշխանությունը նախ ուզում է Վանաձորն ու Փամբակը միավորել
Աննա Հակոբյանի փակ հանդիպումը ՔՊ-ի հետ․ ինչ նախագիծ է պատրաստվում բերել ԱԺ