Օրեր առաջ, մի քանի քահանաների թվում, տիրադավներին միանալու հայտարարություն արեց նաեւ Քանաքեռի Սուրբ Հակոբ եկեղեցու հոգեւոր հայր Տեր Շմավոն քհն. Ղեւոնդյանը:
Ղեւոնդյանն առաջներում երբեք աչքի չի ընկել իշխանահաճո կեցվածքով, անգամ կան տեղեկություններ, որ ընդդիմադիր է եղել, քննադատել է Փաշինյանի իշխանությանը, թեպետ համացանցում նրա հարցազրույցները որոնելիս չգտանք գեթ մեկ քննադատական խոսք` ուղղված իշխանավորներին: Արդեն քանի օր է՝ Փաշինյանին միացած քահանաներին հանրությունը սուր քննադատության է ենթարկում, վերջիններիս եւս անվանելով տիրադավներ:
«Հրապարակը» զրուցել է Տեր Շմավոն քհն. Ղեւոնդյանի հետ:
– Ի վերջո` ինչո՞ւ որոշեցիք միանալ իշխանության պահանջին: Ո՞րն էր Ձեր այս քայլի նպատակն ու տրամաբանությունը:
– Իմ որոշումը ես ընդունել եմ ինքս, մտածելով եւ ինքս գալով այդ եզրակացությանը: Ես պարզապես որոշել եմ իմ անվերապահ աջակցությունը հայտնել իմ առաջնորդին` Նավասարդ արքեպիսկոպոս Կճոյանին, որը նախաձեռնել է այս բարենորոգման ընթացքը: Ուժերիս ներման չափով ես լինելու եմ նրա կողքին:
– Բայց խնդիրն այն է, որ Ձեր առաջնորդը հայտնի է «Բենթլի»-ով, շվայտ կյանք վարելով: Ի՞նչ եք կարծում` նա կարո՞ղ է եկեղեցին բարենորոգել իր այդ տեսակով:
– Ես շուրջ 22 տարի է՝ ծառայում եմ Արարատյան հայրապետական թեմում: Ես ծառայել եմ՝ անտեսելով իմ առաջնորդին ուղղված մեղադրանքները, եւ այդպես էլ շարունակում եմ անել….
– Հավանաբար, Դուք եւս լսել եք, որ Վեհափառի հեռացումը պահանջող հոգեւորականներին մեղադրում են իշխանության հետ գործարքի գնալու, նրանց կողմից շանտաժի ենթարկվելու մեջ եւ այլն: Չունե՞ք ասելիք այս մասով:
– Այն տեսակետները, որ շրջանառվում են, թե իբրեւ մեզ վախեցրել են, խոստումներ են տվել եւ այլն, անիմաստ են: Ես համացանցում տեսնում եմ նման մեկնաբանություններ, սակայն դրանք իրականության հետ աղերս չունեն: Ես իմ ընտրության մեջ ազատ եմ: Մեր թեմում կան նաեւ հոգեւորականներ, ովքեր չեն միացել մեր առաջնորդին աջակցելու գործին, սակայն կան նաեւ ինձ նման մարդիկ: Սա արդեն իսկ յուրաքանչյուրի համար պետք է փաստարկ լինի, որ տեղի ունեցածը մեր ազատ կամքի դրսեւորմամբ է տեղի ունեցել:
– Անդադար խոսում եք եկեղեցին բարենորոգելու մասին: Ի՞նչ ասել է բարենորոգում: Ինչպե՞ս եք այն պատկերացնում:
– Եկեղեցին առաջին հերթին պետք է ապաքաղաքականացվի: Որեւիցե մի քաղաքական գործընթացի մեջ ներգրավված չպետք է լինի եկեղեցին: Եկեղեցու հաստատված կանոնակարգ-սահմանադրություն պետք է լինի, որով եկեղեցին պետք է կառուցի իր ներքին կյանքը: Մնացած պրոցեսները տեղի կունենան ժամանակի ընթացքում, երբ ներկայիս Վեհափառը հանգստի կկոչվի, եւ կընտրվի նոր կաթողիկոս:
– Բայց այժմ Դուք եք միջամտում Փաշինյանի քաղաքական դավադիր նպատակներին: Ի դեպ` այլ դեպքերում ե՞րբ են եկեղեցականները միջամտել քաղաքական պրոցեսներին:
– Եթե հոգեւորականները նկատել են, որ Հայ առաքելական եկեղեցին որոշ չափով քաղաքականացված է, ուրեմն դա այդպես է, ես հիմա չեմ ուզում հատիկ-հատիկ թվարկել այդ մասին: Իրողությունը դա է եւ բացահայտ է:
– Վեհափառն այն եզակի գործիչներից է, որը պարբերաբար խոսում է Արցախի մասին, արցախցիների ոտնահարված իրավունքների եւ Բաքվում խոշտանգվող հայ ռազմագերիների մասին: Այս ամենը Դուք քաղաքականությո՞ւն եք համարում:
– Եկեղեցին չպետք է շեղվի իր առաքելությունից` ծառայելու իր ժողովրդին եւ Քրիստոսի լույսը տարածելու, քրիստոնեական արժեքները ժողովրդի մեջ ամրապնդելու գործից: Սա է մեր եկեղեցու թիվ մեկ նշանակետը…. Եկեղեցին պետք է շարունակի իր այդ առաքելությունն իրագործել: Շատ պրիմիտիվ է կարծելը, թե ինչ-որ բանի մասին խոսելը քաղաքականություն է: Ես ասացի, եւ այսքանով եկեք սահմանափակվենք` եկեղեցին չպետք է քաղաքական պրոցեսներին խառնվի։
– Ինչո՞ւ միայն նոր որոշեցիք, որ եկեղեցին շեղվել է իր առաքելությունից: Եթե Ձեր մոտեցումն ապաքաղաքական է, ինչո՞ւ տարիներ առաջ էլ այդ մասին չէիք խոսում: Ի վերջո` նոր չեն եկեղեցու արատներն ի հայտ եկել, եթե այդպիսիք կան….
– Ցանկացած գործողություն կատարելու համար պահը պետք է հասունանա: Պահը հասունացել է: Բարենորոգման մասին միշտ էլ մենք` տարբեր ժամանակներում խոսել ենք….
– Բայց Սահմանադրությունը հոգեւորականին չի արգելում՝ ունենալ քաղաքական դիրքորոշում: Ո՞վ է ասել, որ եկեղեցականը պետք է լինի բացարձակ ապաքաղաքական: Եկեղեցականն էլ, մյուս բոլորի պես, մասնակցում է քաղաքական ընտրություններին եւ ունի տեսակետ հայտնելու իրավունք:
– Ես այլեւս չեմ կարող խոսել: Եկեք այսքանով սահմանափակվենք:
Բաց մի թողեք
Մերձավանում հետաքրքրվում են, թե ինչ եղավ Մհեր Ախտոյանը․ Լուսանկար
Նիկոլ Փաշինյանը մտադիր է «սրտիկի» ժեստը դարձնել նախընտրական
Էրդողանի «մտածած, բայց չհնչեցրած տեսակետները»