Թուրքիայի նախագահ Էրդողանը սպասում է, որ Պաղեստինի առաջնորդ Մահմուդ Աբասը ներողություն կխնդրի« գրում է «Հյուրիեթ» և մանրամասնում, որ Թուրքիայի խորհրդարանը նրան հրավիրել էր ելույթ ունենալու նույն օրը, երբ Իսրայելի վարչապետ Նաթանյահուն պետք է հանդես գար ԱՄՆ Կոնգրեսի Ներկայացուցիչների պալատում, սակայն պաղեստինյան կողմը «հստակ պատասխան չի տվել»:
Ինչ շարժառիթներ էլ որ Պաղեստինի ինքնավարության առաջնորդն ունեցած լինի, իրողությունը չափազանց ցցուն է. Էրդողանը հանդես է գալիս որպես Պաղեստինի պետականության, նրա ժողովրդի հովանավոր, իսկ քաղաքական «ներկայացումը» չի կայանում: Եվ դա տեղի է ունենում մի իրավիճակում, երբ տեղեկություն է տարածվում, որ Իսրայելի վարչապետը Վաշինգտոն է տարել Գազայի հատվածում հրադադարի հաստատման և «միջանկյալ կարգավորման» ծրագիր:
Նաթանյահուն առաջարկում է իսրայելցի պատանդների վերադարձ, հրադադարի հաստատում, Գազայից իսրայելական զինված ուժերի փուլ առ փուլ դուրսբերում, միջազգային ներկայություն, բայց պայմանով, որ պաղեստինյան անկլավի և Եգիպոսի սահմանին վերահսկողություն իրականացնեն Իսրայելի անվտանգության ուժերը:
Ամերիկյան մամուլի տեղեկություններով՝ այդ նախագծի շուրջ բանակցություններին կներգրավվեն Քաթարի վարչապետը, ԱՄՆ Կենտրոնական հետախուզության վարչության, իսրայելական «Մոսադի» տնօրենները և Եգիպտոսի ռազմական հետախուզության պետը:
Իսրայել-պաղեստինյան կարգավորման բանակցություններից Թուրքիան դուրս է մնում և, հավանաբար, Սիրիայի հետ հարաբերությունների կարգավորման նախաձեռնությունը տարածաշրջանի երկրներին և Արևմուտքին հղած ազդակ է, որ առանց Անկարայի մասնակցության Մերձավոր Արևելքում կայուն և երկարատև կարգավորում հասնել հնարավոր չէ: Դամասկոսի մերձիշխանական շրջանակներից, սակայն, հայտնի է դարձել, որ Ասադը համաձայն է հանդիպել Էրդողանին, եթե թուրքական զորքերը սկսեն հեռանալ Սիրիայի տարածքից:
Ուշադրության է արժանի նաև այն, որ Գազայի հատվածում պատերազմի բռնկումից ի վեր առնվազն երկու անգամ անոնսավորվել է Պաղեստինի ինքնավարության առաջնորդի Մոսկվա այցը, բայց այն այդպես էլ չի կայացել: Արդյոք Ռուսաստանը ոչինչ չունի՞ առաջարկելու, թե՞ Մահմուդ Աբասը ձեռնպահ է մնում Վլադիմիր Պուտինի հետ շփումից՝ ենթադրություն անել բարդ է:
Բաց է մնում Իրանի պարագան: Գազայի պատերազմի ընթացքում Պաղեստինի ինքնավարության առաջնորդի հետ Թեհրանը պաշտոնական-հրապարակային երկխոսություն չի ունեցել: Այս առումով հնարավոր է, որ Մոսկվան, Անկարան և Թեհրանը Պաղեստինի հարցում ընդհանուր մոտեցում որդեգրեն, բայց դա կարծես չի հաջողվում Սիրիայի հարցում:
Խնդիրն ուշադրության արժանի է այնքանով, որ Թեհրանը հայտարարել է Հարավային Կովկասի, հայ-ադրբեջանական կարգավորման 3+3 ձևաչափով նախարարական հանդիպում կազմակերպելու մասին: Եթե Ռուսաստանը, Թուրքիան և Իրանը Մերձավոր Արևելքի արմատական կարգավորման հարցում միասնական պլատֆորմ չունեն կամ չեն կարողանում համաձայնեցնել, ապա խիստ կասկածելի է, եթե չասվի անհավանական, որ նրանք Հարավային Կովկասի ստատուս-քվոյի վերաբերյալ կարող են ընդհանուր հայտարարի գալ:
Էրդոաղանի քաղաքական բնույթին տեղյակ աղբյուրները վկայում են, որ նա մի ուղղությամբ դիվանագիտական անհաջողությունը փորձում է փոխհատուցել այլ տեղ հաջողությամբ: Պաղեստինի հովանավորի կարգավիճակ նա, ամենայն հավանականությամբ, չի ստանա: Փոխարենը Թուրքիան Հարավային Կովկասի «պահնորդությա՞ն» է ձգտելու:
Բաց մի թողեք
Էքզիթ-փոլեր. Գերմանիայի ծայրահեղ աջ AfD-ն հստակ առաջատար է Սաքսոնիա-Անհալթի ընտրություններում
«Հակարիի կամրջի մոտ ադրբեջանցիներն ուզում են առաջանալ, հայ սահմանապահները չեն թողնում․ կրակոցներ չկան, միայն լեզվակռիվ է»․ Կոռնիձորի վարչական ղեկավար
Տասնյակ հազարավոր խորվաթներ բողոքի ցույց են անցկացնում վտանգավոր թափոնների աղբավայրի դեմ. Լուսանկար