Ինչ իրավիճակ կստեղծվի Հյուսիսային Կովկասում, եթե Կադիրովն իրոք «հեռանա»

Անցած տարեվերջից ռուսաստանյան թելեգրամ-ալիքները հաղորդել են Մոսկվայում Չեչնիայի ղեկավար Ռամզան Կադիրովի հոսպիտալացման մասին:

Ըստ այդմ, Կադիրովը դեկտեմբերի 25-ին պետք է մասնակցեր ՌԴ Պետական խորհրդի ամփոփիչ նիստին, բայց նրա առողջական վիճակը կտրուկ վատթարացել է, և Չեչնիայի ղեկավարը տեղափոխվել է կրեմլյան հիվանդանոց, որտեղից էլ նրան «տուն են ուղարկել»: Որոշ աղբյուրներ նոր տարվա առաջին օրը հայտնել են, որ «Կադիրովը մահացել է»:

Հունվարի 3-ին Չեչնիայի ազգամիջյան, արտաքին կապերի և տեղեկատվական քաղաքականության հարցերով նախարար Ահմադ Դուդաևը «Կադիրովի մասնակցությամբ» տեսահոլովակ է հրապարակել և տեղեկացրել, որ նրա «տրամադրությունը մարտական է», իսկ հիվանդության մասին «լուրերը տարածում են սատանիստները»:

Որքանո՞վ է հավաստի այդ տեսագրությունը, որ արտատարածել են նաև ռուսաստանյան պաշտոնական լրատվամիջոցները, մնում է խիստ կասկածելի, բայց ավելի ինտրիգային է, թե ինչո՞ւ «մարտական տրամադրություն ունեցող» Կադիրովը Վլադիմիր Պուտինի հրավիրած Պետական խորհրդի նիստին չի մասնակցել: Մանավանդ որ տարին Չեչնիայի համար ընտրական է:

Այս հարցի պատասխանը Կադիրովի նախարար Դուդաևը չի տվել, ուստի մնում է ենթադրել, որ կամ Չեչնիայի ղեկավարն իրոք «ծանր հիվանդ է», կամ նա Ռուսաստանի նախագահի հետ «անհաղթահարելի տարաձայնություններ ունի, ուստի գերադասել է մնալ տանը»:

Ռուսաստանի համար շատ բախտորոշ փուլում Չեչնիայի ղեկավարի գործունակությունը նրա անձնական խնդիրը չէ: Անցած տարեվերջին Վլադիմիր Պուտինը մի քանի օրենքներ և հրամանագրեր է ստորագրել և երկրում փաստացի ռազմական դրություն հաստատել:

BBC-ն պարզել է, որ պատերազմի գրեթե չորս տարիներին Չեչնիան ունեցել է 172 մարդկային զոհ: Այն դեպքում, երբ Բաշկորտոստանում այդ թիվը կազմել է ավելի քան ութ հազար: Վիճակագրությունը վկայում է, որ Կադիրովը չեչեններին խնայում է, իսկ կենտրոնական իշխանությունը ձեռնպահ է մնում իրավիճակին միջամտելուց:

Ոչ ոք չգիտի, թե Չեչնիայում և առհասարակ Հյուսիսային Կովկասում ինչ իրավիճակ կստեղծվի, եթե Կադիրովն իրոք «հեռանա»:

Անցյալ նոյեմբերին նա հայտարարել է, որ մտադիր է մասնակցել ընտրություններին: Ըստ որոշ աղբյուրների, Չեչնիայի առաջնորդի պաշտոնի համար «վաղուց պայքարում են» պետական դումայի պատգամավոր Ադամ Դելիմխանովը և ՊՆ քաղաքական վարչության պետի տեղակալ Ապտի Ալաուդինովը:

Վերջինս միաժամանակ համարվում է չեչենական «Ախմատ» հատուկ նշանակության զորախմբի հրամանատար: Կադիրովից հետո Չեչնիան կարող է անկառավարելի դառնալ: Այդ դեպքում ապակայունացումը կսպառնա ամբողջ Հյուսիսային Կովկասին: