Իսկ ու՞ր մնաց ուղիղ ժողովրդավարության վերաբերյալ խոստումների տարափը

Հ1-ի, այսինքն հանրության հարկային միջոցներով գործող լրատվամիջոցի եթերում Տավուշում ապրող մարդիկ, նրանց իրավունքների խախտումները բացակայում են: Հանրայինը որևէ կերպ չի անդրադառնում բողոքի ցույցերին: 

Ինչո՞ւ է հանրայինը քողարկում, կոծկում ու չի ներկայացնում իրականությունը: Ավելին, որևէ կերպ չի անդրադառնում բողոքի ակցիայի մասնակիցներին բերման ենթարկելու փաստին, ինչպես նաև այն հանգամանքին, որ արդեն երկու օր է ինչ Կիրանցը փակ է այնտեղ չգրանցված անձանց համար:

Սա՞ է ժողովրդավարությունը, չներկայացնել իրականությունը, ժողովրդին ճնշելով իրացնել մի ծրագիր, որը որևէ կերպ չի բխում սեփական ժողովրդի շահերից:

Իսկ ու՞ր մնաց ուղիղ ժողովրդավարության վերաբերյալ խոստումների տարափը: Դե ռեֆերենդում արեք, թե միայն սպառնալ կարող եք, թե վայ-վայ, Ադրբեջանը կհարձակվի, կամ կարմիր բերետավորները բերման կենթարկեն: Իսկ դիվանագիտությունն ու՞ր է, որ միայն պատերազմն եք ճանաչում, որպես հարևանի հետ շփվելու միջոց, կամ բռնությունը, որպես ժողովրդական պայքարը ճնշելու ձև:

Դա՞ է քաղաքական գործունեության ու բանակցային հմտությունների ձեր որակը:
Ես գնալու եմ, որպես ՀՀ մտահոգ քաղաքացի, իրավապաշտպան, անձամբ հանդիպեմ մարդկանց հետ, լսեմ իրենց խնդիրները, քանի որ դա չի անում Հ1-ը, որտեղից ես կկարողանայի չկտրվելով իմ ամենօրյա գործերից օբյեկտիվ տեղեկատվություն ստանալ: Ուստի, դուք ինձ այլ ելք չեք թողնում, քան անձամբ գնալ ու լսել Տավուշում ապրող մարդկանց լռեցված ձայները:

Զարուհի Հովհաննիսյան