Ինչ է Թրամփը ցանկանում ԵՄ-ից

ԱՄՆ նախագահ Դոնալդ Թրամփը ձգտում է բարձրացնել ԵՄ-ից չինական ապրանքների մաքսատուրքերը՝ որպես Վաշինգտոնի հետ առևտրային գործարք կնքելու պայման, հայտնել է «The Wall Street Journal»-ը (WSJ)՝ հղում անելով աղբյուրներին։

ԱՄՆ-ը պնդում է, որ Եվրամիությունը միանա ամերիկյան քարոզարշավին, որի նպատակն է տնտեսական ճնշում գործադրել Չինաստանի վրա։ Վաշինգտոնը ցանկանում է, որ եվրոպական երկրները նոր մաքսատուրքեր սահմանեն չինական ապրանքների վրա։

Նմանատիպ պայմանավորվածություն ձեռք է բերվել Մեծ Բրիտանիայի հետ. Լոնդոնը համաձայնել է լրացուցիչ տուրքեր սահմանել չինական պողպատի վրա, իսկ Վաշինգտոնը՝ նրա հետ առևտրային գործարք կնքել։

Չինաստանը, սակայն, եվրոպական արտահանման համար կարևոր շուկա է, և Բրյուսելը շահագրգռված չէ Պեկինի հետ առևտրային պատերազմի մեջ, գրել է թերթը։

Սպիտակ տունը զայրացած է, որ ԵՄ առևտրային առաջնահերթությունները դանդաղեցրել են բանակցությունները, ասել են աղբյուրները: