Փաշինյանի պաշտոնանկությունների շղթան, էլ ում «գլուխները կթռնեն»

Նիկոլ Փաշինյանի որոշումով պաշտոնանկ է եղել ոստիկանապետ, ՆԳՆ նախարարի տեղակալ Արամ Հովհաննիսյանը: Նաև հայտնի է, որ նրա փոխարեն ոստիկանապետ, ՆԳՆ նախարարի առաջին տեղակալ է նշանակվել Լոռու մարզպետ Արա Ղազարյանը, որը մինչև այդ եղել է ոստիկանությունում, իսկ 2018 թվականի շարժման օրերին էլ զբաղեցրել է Լոռու ոստիկանապետի պաշտոնը:

Նիկոլ Փաշինյանի որոշումը հաջորդում է Հայաստանում հասարակական հարաբերություններում հերթական աղմկոտ և ողբերգական պատմությունների շարքին, որը ցավալիորեն վկայեց, որ Հայաստանում չկա աշխատող իրավապահ համակարգ:

«Վերջին կաթիլը» գուցե եղել է այսօր տարածված տեղեկությունը, որ հերթական «ռազբորկան» է եղել հրազենի գործադրմամբ: Անշուշտ, միանգամայն տրամաբանական է ոստիկանապետի պաշտոնանկության որոշումը, բայց անկասկած է նաև, որ այդ որոշումը չի կարող լինել բավարար:

Ավելին, այդ որոշումը փաստացի կարող է դառնալ ընդամենը հանրության վրա տպավորություն թողնելու, գոլորշի բաց թողնելու, խոշոր հաշվով՝ նախընտրական քարոզչական էֆեկտի միտված քայլ: Հետևաբար, կառավարության ղեկավարի արձագանքը պետք է չափվի ոչ թե այդ պաշտոնանկությամբ, այլ հաջորդիվ իրավիճակի փոփոխությամբ:

Առավել ևս, որ ընդամենն ամիսներ առաջ եղավ ուժային բլոկի, այդ թվում՝ ՆԳՆ նախարարի պաշտոնանկություն, նոր նշանակումներ, բայց իրավիճակի զրո փոփոխություն:

Հետևաբար, ցուցիչը կարող է լինել միայն իրավիճակի տեսանելի փոփոխությունը և հանրային կյանքում հասարակական կարգի պահպանության հարցում իրավապահ համակարգի արդյունավետությունը:

Հասարակական կարգի պահպանություն ոչ թե քաղաքական ակցիաների ընթացքում միայն, այլ հասարակական կարգի պահպանություն ու հանրության պաշտպանություն տարբեր քրեական ենթամշակութային դրսեւորումներից, «ռազբորկաներից»:

Հայաստանում հասարակական միջավայրում խուլիգանությունը, «ռազբորկան», նմանօրինակ որևէ դրսեւորում պետք է ենթարկվի խստագույն պատասխանատվության և պետք է հասցվի զրոյի:

Երևույթը, ենթամշակույթը կարող է և չվերանալ, բայց դրա հանրային դրսևորումները զրոյի հասցնելը հնարավոր է, անհրաժեշտ է, և պետք է լինի պետական խնդիր: Այդ հարցում միայն գործնական փոփոխությունը կարող է լինել աշխատանքի ցուցիչ: