Միշտ իմացեք՝ հեղաշրջման պլան ոչ ոք երբեք չի գրում․ Բադալյան

Երեկ՝ վաղ առավոտից Սրբազան շարժման առաջնորդի, ընդդիմադիր ակտիվ գործիչների ու շարժման աջակիցների տներում իրավապահները խուզարկություններ իրականացրին, մեծ թվով մարդկանց բերման ենթարկեցին, որոնցից մի մասին ձերբակալեցին, մի քանիսին ազատ արձակեցին:

Հրապարակ թերթը գերլ է․ Բերման են ենթարկվել Բագրատ արքեպիսկոպոս Գալստանյանը, Հրայր սարկավագը, Վահագն Չախալյանը, պատգամավոր Արթուր Սարգսյանը, այլք: Նախորդ օրն իշխանական կայքերից մեկում հրապարակվել էր մի փաստաթուղթ, որը Նիկոլ Փաշինյանը տեղադրել էր իր պաշտոնական էջում: Այդ փաստաթուղթն իբրեւ թե հեղաշրջման մանրամասն ծրագիրն է, որը փոխանցել էր ընդդիմության շարքերից իրենց աղբյուրը:

Այդ «հեղաշրջման ծրագրում» նշվում էր, որ Փաշինյանին վարկաբեկելու եւ ծաղրելու գործընթաց պետք է սկսվի, «շշուկների» տարածմամբ, բարոյական քարոզիչներով, ապատեղեկատվություն տարածելով եւ այլն: Քաղտեխնոլոգ Արմեն Բադալյանը, «Հրապարակի» հետ զրույցում անդրադառնալով այդ փաստաթղթին, ասաց, որ դա չափազանց պրիմիտիվ հնարք է: «Եթե ծանոթ եք հատուկ ծառայությունների ոճին, միշտ իմացեք` հեղաշրջումների իրագործման պլան ոչ ոք կյանքում երբեք չի գրում: Երբեք չեն գրում, վերցրեք ցանկացած հատուկ ծառայությունների վերաբերյալ գրքեր, հատուկ ծառայությունների վերաբերյալ փաստավավերագրական ֆիլմեր, գրականություն՝ կիմանաք: Հեղաշրջման պլանը երբեք չի գրվում, չի ֆիքսվում՝ դա բանավոր հիշվող գործողություն է, որտեղ կոնկրետ մարդիկ պետք է իմանան՝ ով ինչ է անելու եւ որ պահին ու որտեղ: Հեղաշրջման ծրագիրը թղթի վրա չեն տպում, որ հետո քսերոքսով բազմացնեն, թե ոնց պլանով շարժվեն: Երեւի դուք չեք հիշի. Խորհրդային Միության ժամանակ մուլտֆիլմ կար՝ գողություն ամերիկյան, գողություն ֆրանսիական եւ գողություն իտալական ձեւով: Գողություն իտալական ձեւովը գողության մի ձեւ էր, երբ ամբողջ քաղաքը գիտեր՝ Մարիոն գնում է բանկը թալանելու: Իրենք էին Մարիոյին վերցնում, որ գնար ու բանկը թալաներ, եւ հետո այդ թալանից ամեն մեկն իր բաժինը ստանում էր: Այսինքն, մուլտֆիլմում դա ծիծաղելի է նայել, բայց այս կյանքում անլուրջ է, չկա նման բան: Որտեղ որ տեսաք, որ գրված է՝ հեղաշրջման պլան, իմացեք, որ դա սարքված է»,- շեշտեց քաղտեխնոլոգը:

Ինչ վերաբերում է բովանդակությանը, ապա կարելի էր ավելի լավ կազմակերպել նման պլանի շարադրումը՝ նշում է Բադալյանը․ «Կարելի էր վարձել կինոսցենարիստ, բավականին լավ գումար տալ սցենարիստին՝ բավականին լավ սցենար կգրեր, կտար»: Հեղաշրջման պլանն անհրաժեշտ էր՝ «լեգիտիմացնելու» այսօրվա մասսայական կալանավորումները՝ շեշտում է քաղտեխնոլոգ Արմեն Բադալյանը։

Շիրակի թեմի առաջնորդ, Գերաշնորհ Տեր Միքայել արքեպիսկոպոս Աջապահյանը «Հրապարակի» հետ զրույցում այս ռեպրեսիվ գործողությունը որակեց որպես ամենասովորական բռնապետություն։ «Սահուն կերպով գնում է դեպի բռնապետություն։ Ինքն ուզում է ասել՝ ինչ կարելի էր իրեն, ուրիշներին չի կարելի` no, no, no։ Ինքը կարող է իրականացնել հեղաշրջում, հեղափոխություն անել` ուրիշը չի կարող։ Բոլոր բռնապետներն էլ այդպես են գալիս, այդպես բռնապետություն են հաստատում. սովորական բռնապետի պահվածք է, մասնավոր բան չկա»,- ասաց Սրբազանը։ Իսկ «հեղաշրջման» վերաբերյալ փաստաթուղթն էլ Շիրակի թեմի առաջնորդը որակեց մանկամիտ մի բան, որը կարծես թե գրված լիներ 16 տարեկան երեխայի կողմից։ Հարցին, թե արդյոք երկա՞ր է շարունակվելու այս ամենը, Սրբազանն ասաց` քանի դեռ նա իշխանության է, այս ամենը շարունակվելու է։ Իսկ հնարավո՞ր է՝ Փաշինյանն այնքան հեռուն գնա, որ փորձի Վեհափառին էլ ձերբակալել։ «Արցախը հանձնածը, հայրենիքը հանձնածը ամեն ինչ էլ կարող է անել։ Բայց հարցն անելը չէ, տակից դուրս գալն է կարեւոր, թե չէ՝ շատ բան կարելի է անել, բայց տակից դուրս գալ է պետք։ Դա ավելի կարեւոր է, քան թե անելը։ Եթե նման բան անի, ո՞նց կմարսի։ Հետո՝ պետք չէ կարճաժամկետ դիտել այդ հարցը, երկարաժամկետ է պետք դիտել»,- եզրափակեց Սրբազանը։

Քննչական կոմիտեն երեկ նաեւ հրապարակել էր լուսանկարներ. «Հանցավոր խմբի ղեկավարների եւ մասնակիցների բնակարաններում խուզարկությամբ հայտնաբերվել են հանցագործության համար նախատեսված մեծաքանակ առարկաներ եւ իրեր»: Կցված լուսանկարներում նաեւ ձեռագիր գրություններ կային` կոնկրետ մարդկանց անուններով՝ կոնկրետ պաշտոնների դիմաց: Այսպես կոչված, Սրբազան շարժման ստվերային կաբինետը: Այդ անունների մեջ կար նաեւ արտակարգ եւ լիազոր դեսպան, Դիվանագետների համահայկական խորհրդի համահիմնադիր Վահագն Մելիքյանի անունը` ԱԳ նախարարի դիմաց: «Հրապարակը» կապ հաստատեց արտակարգ եւ լիազոր դեսպանի հետ։ Նա ասաց, որ տեսել է ՔԿ-ի հրապարակած լուսանկարը, սակայն դրանից բացարձակապես տեղյակ չի եղել: Ինչ վերաբերում է Փաշինյանի գործողություններին, ասաց․ «Ցիրկաչություն է, թե ինչ է ուզում դրանով ասել՝ չեմ կարող»: Կհաջողվի՞ արդյոք կոտրել պայքարի ոգին, Մելիքյանն ասաց, որ պայքարողներից ու ժողովրդից է կախված, եթե ուզեն կոտրվել՝ կկոտրվեն: Իսկ Փաշինյանի քայլերը խոսո՞ւմ են վախի մասին։ «Միանշանակ՝ ցայտնոտ է իր մոտ»: