Դեռ մեկ ամիս առաջ «ՀայաՔվե» քաղաքացիական միավորումը հայտարարել էր, որ Մայր Աթոռի դեմ իշխանության գրոհին դիմադրելու նպատակով եկեղեցին պաշտպանելու նախաձեռնություն են սկսում, քանի որ եկեղեցականների կյանքին վտանգ է սպառնում:
Նախաձեռնությունը մասնավորապես նշել էր. «Թշնամու օրակարգն սպասարկող Նիկոլ Փաշինյանը հարձակվել է հայ ժողովրդի գլխավոր սրբության՝ Մայր Աթոռ Սուրբ Էջմիածնի վրա։ Կատարելով Բաքվի բռնապետ Իլհամ Ալիևի և Կովկասի մուսուլմանների վարչության ղեկավար Ալլահշուքյուր Փաշազադեի ուղիղ ցուցումները՝ Փաշինյանը փորձում է տապալել Հայաստանյայց Առաքելական Սուրբ Եկեղեցու 1725-ամյա նվիրապետության կարգը և պատրաստվում է գնալ վտանգավոր արկածախնդրության։ Նրա վերջին կոչը ՀՀ սահմանադրության կոպտագույն խախտում է. այն ուղիղ ֆիզիկական սպառնալիք է ստեղծում Վեհափառ Հայրապետի և Մայր Աթոռի միաբանների համար։ Մեր հայրենակիցներին կոչ ենք անում մերժել հավատ և քրիստոնեական բարոյականություն չունեցող դավաճանի ազգակործան, սրբապիղծ օրակարգը, լինել արթուն և զգոն՝ անհրաժեշտության դեպքում Մայր Աթոռը պաշտպանելու համար։ Մայր Աթոռին ֆիզիկական վտանգ սպառնալու դեպքում ինքներս կլինենք պաշտպանության առաջին շարքերում»:
Նիկոլ Փաշինյանն այժմ նորից եկեղեցին գրոհելու կոչեր է անում` հայտարարելով, որ Էջմիածնի գլխավոր հրապարակում հավաք է նախաձեռնելու: «ՀայաՔվե» քաղաքացիական միավորման անդամ Արամ Պետրոսյանից «Հրապարակը» հետաքրքրվեց` ի՞նչ վտանգերով է հղի Փաշինյանի վերոնշյալ կոչը, «ՀայաՔվեն» դարձյա՞լ եկեղեցու կողքին է` եկեղեցականների ֆիզիկական անվտանգությունը պաշտպանելու համար:
Արամ Պետրոսյանը Հրապարակի հետ զրույցում նշել է.
– Իհարկե, աջակցում ենք: Վերջին շրջանում դադարել էինք հերթապահել, սակայն քանի որ նոր սադրանքներ են փորձում իրականացնել` եկեղեցու դեմ, մենք նորից մեր աջակցությունը կհայտնենք եկեղեցուն: Մենք մինչև վերջ եկեղեցու կողքին ենք կանգնելու, անգամ մեր կյանքի գնով: Այստեղ ոչ մի «կրիմինալ» չկա: Հայ ենք, պիտի կանգնենք Հայ առաքելական եկեղեցու կողքին:
– Տեղեկություններ կան, որ գուցե նաեւ հենց վաղը Փաշինյանը` իր քարոզիչների ու գրոհայինների հետ հարձակվի Վեհարանի վրա: Ե՞րբ եք պատրաստվում գնալ Էջմիածին, ի՞նչ եք ծրագրում:
– Այն ժամանակ հերթափոխությամբ էինք իրականացնում աշխատանքները: Այսօր երեկոյան մեր անելիքների մասին կորոշենք:
– Ի՞նչ եք կարծում` կլինե՞ն բախումներ: Եկեղեցու շուրջ օղակը Փաշինյանը գնալով սեղմում է:
– Նա բախումների մասնագետ է: 2008 թվականին էլ իր սիրտը փառավորվել էր բախումներից, արյունից, Աստված մի արասցե, որ մեր ազգը նորից գնա նման բախումների: Դա ամենավտանգավոր բանն է, որ կարող է լինել: Մեր նպատակը բախումը չէ, մեր նպատակը հասարակությանը հաշտեցնելն է:
– Օրեր առաջ Գլխավոր դատախազություն հաղորդում էիք ներկայացրել` Փաշինյանի հայտարարությունների մասով: Կա՞ որևէ արձագանք:
– Ես որպես իրավաբան հայտարարում եմ, որ Նիկոլ Փաշինյանի հայտարարություններում կան ակնհայտ հանցագործության տարրեր: Բայց քանի որ ես իրավապահ մարմնի ներկայացուցիչ չեմ, այդ հարցին չեմ կարող լուծում տալ: Դատախազությունը դեռևս ոչ մի արձագանք չի տվել ներկայացված հաղորդմանը: Բայց այ ընդդիմադիրներին ինչ-որ մի անմեղ խոսքի համար, կամ երեք տարի առաջ արած հայտարարությունների համար տանում են կալանքի: Հաշվի չեն առնում` ով ով է, զոհվածի ծնող է, անչափահաս երեխաների մայր է, առողջական խնդիրներ ունի, թե ոչ, իրենց համար լրիվ մեկ է, մարդիկ հրաման կատարող են, բայց Նիկոլ Փաշինյանի բոլոր հայտարարությունները հանդուրժում են:
– Քանի որ եկեղեցականների կյանքին, ըստ էության, վտանգ է սպառնում, չարժե՞ նաև ոստիկանություն դիմել:
– Եկեղեցականները պետք է դիմեն, քանի որ, այո, նրանց կյանքին իրոք վտանգ է սպառնում: Նիկոլի ամեն մի ասածի տակ կա մեծ սպառնալիք: Մենք չորս հոդվածով հաղորդումներ ենք ներկայացրել, անձնական կյանքի գաղտնիությունից մինչև բռնության կոչեր: Ոչ միայն դատախազություն ենք դիմել, այլ` Հակակոռուպցիոն կոմիտե, ինչպես նաև Քննչական, սակայն ոչ մի կողմից արձագանք չկա: Վստահ եմ, որ գրպանային իրավապահները չեն գործելու օրենքով, բայց քանի որ Հայաստանը իրավական պետություն է, մենք առաջ ենք շարժվելու միայն սահմանադրական ճանապարհով:
Բաց մի թողեք
Դե, ի՞նչ ասեմ, թող մյուս այտն էլ դեմ տան Փաշինյանին. Լեւս Դավթյան
Մասնակից մի դարձեք այդ հանցագործություններին․ Գուգարաց թեմի առաջնորդ․ Լուսանկար
Իշխանությունը փորձում է խորքային խնդիրը բառախաղերի դաշտ տանել․ Օրբելյան