Չինաստանը և Պակիստանը մշակել են Իրանում և նրա շուրջ իրավիճակի դիվանագիտական կարգավորման իրենց առաջարկությունը: Այդ մասին դիվանագիտական աղբյուրներից հայտնի է դարձեն Israel Inside-ին:
Ըստ այդմ, Պեկինը և Իսլամաբադը առաջարկում են «անհապաղ հրադադար հաստատել և բանակցություններ սկսել՝ պայմանով, որ լիովին հարգվում է ինչպես Իրանի, այնպես էլ Պարսից ծոցի արաբական երկրների կատարյալ ինքնիշխանությունը»:
Չինաստանը և Պակիստանը «երաշխավորել են, որ հրադադարի հաստատման և ռազմական գործողությունները չվերսկսելու կայուն համաձայնության դեպքում կհաջողվի Հորմուզի նեղուցում վերականգնել ազատ նավագնացությունը»:
Պեկինը և Իսլամաբադը միաժամական առաջարկել են «վերջ տալ էներգետիկ ենթակառուցվածքների, նավթավերամշակման ձեռնարկությունների, քաղցրահամ ջրի արտադրության կայանքների փոխադարձ հրթիռակոծությանը»:
Ավելի վաղ Իրանի շուրջ իրավիճակի կարգավորման հարցով, ինչպես հայտնի է, Իսլամաբադում կայացել է Թուրքիայի, Սաուդյան Արաբիայի, Եգիպտոսի և Պակիստանի արտաքին գործերի նախարարների խորհրդատվական հանդիպում:
Դատելով այդ մասին տեղեկատվության գրեթե բացակայությունից, կողմերին, կարծես, չի հաջողվել հասնել որևէ փոխըմբռնման: Ըստ որոշ աղբյուրների, Պարսից ծոցի արաբական միապետությունները Միացյալ Նահանգներից «պահանջում են պատերազմը հասցնել հաղթական ավարտի»՝ զգուշանալով հետկոնֆլիկտային Իրանի «վրեժխնդրությունը»:
Ուշագրավ է, որ Չինաստանը, ֆորմալ առումով հանդիսանալով Իրանի ռազմավարական դաշնակիցը, պատերազմի մեկնարկից ավելի քան մեկ ամիս հետո հանդես է գալիս որպես միջնորդ, ընդ որում՝ տարածաշրջանի ազդեցիկ երկրներից մեկի՝ Պակիաստանի, հետ միասին: Կարելի է ենթադրել, որ Չինաստանը «սառնասրտորեն սպասել է իր ժամին»:
Ըստ երևույթին, Պեկինի և Իսլամաբադի հաշվարկը կառուցված է հեռանկարի վրա, որ Իրանի դեմ պատերազմում «երկընտրանքի առջև կանգած Դոնալդ Թրամփը կարող է ընդունել այդ առաջարկությունը», մանավանդ որ այն ոչինչ չի կանխորոշում, բացի երաշխավորված հրադադարից:
Իսրայելական աղբյուրները Չինաստանի և Պակիստանի համատեղ նախաձեռնության մասին տեղեկությունը «սրերով են ընդունել»: Ռուսալեզու vesty-ն փոխանցել է «կառավարության իրազեկ պաշտոնյայի» տեսակետը, որ եթե չին-պակիստանյան «նախաձեռնությունը Միացյալ Նահանգների կողմից ընդունվի, ապա դա կնշանակի Դոնալդ Թրամփի գլոբալ պարտություն, իսկ Իրանի կրոնապետական վարչակազմը պատերազմից դուրս կգա որպես հաղթող կողմ»:
Անցյալ շաբաթ իսրայելական մամուլում տեղեկություն է հայտնվել, որ ԱՄՆ նախագահը «Իսրայելի անկախության օրը՝ ապրիլի 9-ին, կժամանի Երուսաղեմ և կհայտարարի Իրանի դեմ պատերազմում հաղթանակի մասին»:
Նույն աղբյուրները նաև հայտնել են, որ «նախատեսված է Կնեսեթում Թրամփի ելույթը, որից հետո նա կարժանանա Իսրայելի հատուկ մրցանակի»: Ըստ երևույթին, դա տեղի չի ունենա:
Երբ «իրանական խաղի մեջ է մտնում» Չինաստանը, ուրեմն խաղադրույքը չափազանց բարձր է: Եվ խնդիրն ամենից առաջ Մերձավոր Արևելքում ԱՄՆ ազդեցության պահպանման-չպահպանման մասին է:
Բաց մի թողեք
Ղազախստանը սահմանադրությամբ փակել է Նազարբաևի դարաշրջանը
Բարդ է ասել, թե Հայաստանին ի՞նչ կտա այդ ընթացակարգի կիրառումը ՌԴ-ի կողմից
Կրեմլը չէր ձգտում ՀՀ-ում ձևավորել այն արդյունքը, որը կցանկանար ընտրություններում․ Ստանկևիչ