ԱՄՆ վարչակազմը մտահոգված է, որ Վաշինգտոնը կարող է ներքաշվել Իրանի հետ սառեցված հակամարտության մեջ՝ առանց ռազմական գործողությունների վերսկսման կամ համաձայնագրի, Axios-ին ասել են ամերիկացի պաշտոնյաները։
Կան մտահոգություններ, որ հակամարտության ո՛չ ռազմական, ո՛չ էլ դիվանագիտական լուծում չի լինի, և ԱՄՆ-ն ստիպված կլինի երկար ժամանակ պահպանել զգալի ուժեր տարածաշրջանում՝ պահպանելով Իրանի ծովային շրջափակումը: Մինչդեռ յուրաքանչյուր կողմ ուշադիր կհետևի մյուս կողմի գործողություններին՝ սպասելով, որ կա՛մ կհարվածեն, կա՛մ կթուլացնեն իրենց զգոնությունը:
Մի աղբյուրի խոսքով՝ այս սցենարը «ամենավատ բանն է, որ կարող է պատահել [ԱՄՆ նախագահ Դոնալդ] Թրամփի հետ քաղաքական և տնտեսական առումով», քանի որ մոտենում են 2026 թվականի նոյեմբերի 3-ին ԱՄՆ-ում կայանալիք միջանկյալ ընտրությունները։
Թրամփի խորհրդականներն Axios-ին ասել են, որ ամերիկացի առաջնորդը տատանվում է հետագա հարվածներ հասցնելու և Իրանի վրա կիրառվող տնտեսական միջոցառումների առավելագույն ազդեցությանը սպասելու միջև, որոնք կարող են Թեհրանին դրդել զիջումների գնալ, այդ թվում՝ միջուկային ծրագրի հարցում։
Ըստ խորհրդականներից մեկի՝ Թրամփը նրան ասել է, որ «[Իրանի ղեկավարությունը] միայն ռմբակոծությունն է հասկանում»։ Աղբյուրը Թրամփի ներկայիս վիճակը նկարագրել է որպես «հիասթափված ռեալիստի»։ «Նա չի ուզում ուժ կիրառել, բայց չի նահանջի», – ասել է նա։
Ըստ Axios-ի՝ Թրամփը երկուշաբթի օրն իր ազգային անվտանգության թիմի հետ քննարկել է Իրանի՝ նոր բանակցությունների փուլ անցկացնելու վերաբերյալ առաջարկը, սակայն որոշում չի կայացվել։
Միացյալ Նահանգները և Իսրայելը փետրվարի 28-ին պատերազմ էին սկսել Իրանի դեմ։ Ապրիլի 7-ին ԱՄՆ նախագահ Դոնալդ Թրամփը հայտարարել էր Թեհրանի հետ երկշաբաթյա փոխադարձ հրադադարի մասին։ Իրանի գնահատականներով՝ պատերազմի 40 օրվա ընթացքում ԱՄՆ-Իսրայել հարվածների հետևանքով զոհվել է 3375 իրանցի։
Ապրիլի 11-ին Թեհրանը և Վաշինգտոնը բանակցություններ էին վարել Իսլամաբադում, սակայն մի շարք տարաձայնությունների պատճառով չէին կարողացել համաձայնության գալ հակամարտության երկարաժամկետ կարգավորման շուրջ։
Ապրիլի 21-ին ԱՄՆ նախագահը հայտարարել էր Իրանի հետ հրադադարը երկարաձգելու իր մտադրության մասին։ Իրանի պետական հեռուստատեսության հաղորդմամբ՝ Թեհրանը չի մտադիրվում ճանաչել Վաշինգտոնի կողմից հրադադարի միակողմանի երկարաձգումը և կգործի իր սեփական շահերին համապատասխան։
ԱՄՆ Ֆինանսների նախարար Սքոթ Բեսենթը հայտարարել է, որ ամերիկյան վարչակազմը կարող է սանկցիաներ կիրառել այն ընկերությունների հանդեպ, որոնք համագործակցում են իրանական ավիափոխադրողների հետ։
«Իրանական՝ սանկցիաների տակ գտնվող ավիաընկերությունների հետ բիզնեսի վարումը կարող է սպառնալ, որ այդ ընկերությունները կարող են հայտնվել ամերիկյան սանկցիաների տակ։
Օտարերկրյա կառավարությունները պետք է ձեռնարկեն բոլոր անհրաժեշտ միջոցները, որպեսզի իրենց իրավազորության ներքո գտնվող ընկերությունները այդ ընկերությունների օդանավներին ծառայություններ չմատուցեն։ Դա վերաբերվում է նաեւ ավիացիոն վառելիքին, սննդին եւ այլն»,- համաձայն The Wall Street Journal-ի, ասել է նախարար Բեսենթը։
Բաց մի թողեք
«Ֆիդես» կուսակցությունը լուրջ սխալներ է թույլ տվել ընտրարշավի ընթացքում․ Հունգարիայի նախկին վարչապետ
Հայտնի է, թե երբ տեղի կունանա Իրանի նախկին գերագույն առաջնորդ Խամենեիի հուղարկավորությունը
Իրանի հետ խաղաղության համաձայնագիրը մոտենում է, Հորմուզի նեղուցի մոտ նոր ռազմական գործողություններ են բռնկվում. Reuters