Ազգային ժողովի ընդդիմադիր պատգամավորները այցելել են Մայր Աթոռ Սուրբ Էջմիածին։ Նրանց ընդունել է Ամենայն հայոց կաթողիկոս Գարեգին Բ-ն։ Այդ մասին հայտնել է Մայր Աթոռի տեղեկատվական համակարգը։
Իր խոսքում Գարեգին Բ-ն, ի մասնավորի, նշել է, որ այսօր մեր երկրի առջև ծառացած «արտաքին և ներքին մարտահրավերները ենթադրում են նոր փորձություններ, որոնց հաղթահարման հնարավոր ուղիները պահանջում են առավելագույն ջանքեր, պետական ու ազգային կառույցների, մասնագիտական տարբեր ասպարեզներում քաջահմուտ գործիչների համախմբվածություն»։
Այս իրավիճակի հանդեպ Կաթողիկոսը «մեծապես մտահոգիչ» է գնահատել «ներազգային կյանքում տիրող անհամերաշխությունը, ջլատիչ վնասաբեր գործողությունները, հասարակության պառակտվածությունը, քաղաքական բևառացումը, նվիրական արժեքների և ընկալումների աղավաղումը, նաև Հայոց եկեղեցու դեմ գործադրվող օրինազանց հակասահմանադրական քայլերը, որոնք խոչընդոտում են Եկեղեցու արդյունավոր առաքելությանը ազգային անդաստանում» և ամփոփել, որ արդյունքում «խարխլվում են ազգային միաբանության հիմքերը, Սփյուռք-Հայաստան հարաբերությունները, խաթարում ․․․ ժողովրդավարության և օրինականության ամրապնդումը․․․»։
Կաթողիկոսի «բանադրանքի» հասցեատերը, անկասկած, վարչապետ Նիկոլ Փաշինյանն է, «Քաղաքացիական պայմանագիր» կուսակցությունը։ Հիշվում է, որ նախընտրական շրջանում Գարեգին Բ-ն այցելել է «Ուժեղ Հայաստան» դաշինքի առաջնորդ Սամվել Կարապետյանին։
Այդ առթիվ Մայր Աթոռի տեղեկատվական համակարգը մամուլի փոխանցել է, որ նա Սամվել Կարապետյանին մաղթել է, որպեսզի իրեն բնորոշ «եկեղեցասիրությամբ և հայրենասիրությամբ շարունակի ազգօգուտ ծանրակշիռ ներդրումը բերել հանուն հայրենիքի եւ աշխարհասփյուռ հայոց կյանքի պայծառության»։
«Ուժեղ Հայաստան» խմբակցության ղեկավար Նարեկ Կարապետյանը, խոսելով պետական ներուժի ձևավորման գաղափարական հիմքի մասին, շեշտել է հայ ժողովրդի «առանձնահատկությունը՝ որպես համաշխարհային ազգի»։
Ըստ երևույթին, Ամենայն հայոց կաթողիկոսը դա է նկատի ունեցել, երբ արձանագրել է «ազգային միաբանության հիմքերի և Սփյուռք-Հայաստան հարաբերությունների խարխլումը»։ Փաստացի դա նշանակում է, որ Գարեգին Բ-ն Հայաստանի գործող իշխանություններին ճանաչում է «համաշխարհային ազգի պառակտիչ», իսկ «Ուժեղ Հայաստանը» նպատակադրվում «վերականգնել համաշխարհային ազգի կարգավիճակը»։
Կաթողիկոսի գործադրած եկեղեցական բառապաշարը և ոճը նրա խոսքի քաղաքական իմաստը չեն սքողում։ Եվ դա ամենավտանգավորն է, գործող իշխանությունը ձևավորվել է քաղաքացիների քվեով։ Իշխանություններին որակել «ազգային միաբանության հիմքերը խարխլող»՝ նույնն է, թե նրա օգտին քվեարկածներին ճանաչել «հերձվածող»։
Գարեգին Բ-ն, մինչդեռ, ոչ թե ընդդիմության կամ Սփյուռքի ազգային կառույցների, այլ՝ Ամենայն հայոց կաթողիկոսն է, և Հայ առաքելական եկեղեցու բոլոր հետևորդները նրա հոգևոր զավակներն են։
Օգոստոսի 2-ին, ըստ էության, Կաթողիկոսը չի ճանաչում հունիսի 7-ի քվեարկության արդյունքները և ճիշտ է անում, ինչպես հանրության մեծամասնությունը։։
Բաց մի թողեք
Որ հանձնաժողովներն են ընտրելու «Ուժեղ Հայաստան»-ը. ինչ է հայտնի
Հաղորդում հանցագործության մասին
Ծառուկյանի ձերբակալությունը կարող է հանգեցնել պետության դեմ արբիտրաժային վարույթի