Դատավորը վատացել է, նիստը հետաձգվել

Վճռաբեկ դատարանի քաղաքացիական պալատի դատավոր Նաիրա Հովսեփյանին կարգապահական պատասխանատվության ենթարկելու միջնորդությունը տեւական ժամանակ ԲԴԽ-ում մնալուց հետո` ապրիլի 17-ին, քննության առարկա է դարձել։

«Հրապարակ»-ը տեղեկացավ, որ ապրիլի 17-ին նշանակված նիստը չի կայացել, հետաձգվել է։

Մեր տեղեկություններով` դատավորին կարգապահական պատասխանատվության ենթարկելու մասին նիստի ժամանակ ԲԴԽ նախագահ Արթուր Աթաբեկյանը հայտնել է, որ տիկին Հովսեփյանի ինքնազգացողությունը վատացել է, ուստի Նաիրա Հովսեփյանին առնչվող նիստը հետաձգվում է։

ԲԴԽ-ից մեր տեղեկությունները հաստատեցին` նշելով, որ հաջորդ նիստը մայիսի 12-ին տեղի կունենա։

Հիշեցնենք, որ Նաիրա Հովսեփյանը պատերազմում զոհված Գեւորգ Արշակյանի մայրն է: Բայց նրա արտոնյալ կարգավիճակը, այն, որ իր նկատմամբ վարույթները հարուցվում են եւ կարճվում, ոչ թե հերոս որդու հանգամանքով է պայմանավորված, այլ նրանով, որ նա Աննա Հակոբյանի ընկերուհին է: Ավելի վաղ «Հրապարակ»-ը գրել էր, որ դատավորը փորձում է օգտագործել անձնական կապերը՝ այս վարույթը եւս ԲԴԽ-ում վիժեցնելու համար, սակայն նրան հասկացրել են, որ դա ավելի կվատթարացնի իր վիճակը:

Մանավանդ՝ մեկ անգամ արդեն նրա որդու հանգամանքը դեր է խաղացել․ ԲԴԽ-ն պաշտոնապես հայտարարեց, որ որդու մահվամբ պայմանավորված՝ դատավորը ծանր հոգեվիճակում է եղել, ու այդ հիմքով կարճում են վարույթը, եւ նույն կարգապահական խախտումը, որի համար այլ դատավորների լիազորությունները դադարեցվել էին, Նաիրա Հովսեփյանին ներվեց:

Սակայն, ըստ էության, խախտումը եզակի բնույթ չի կրում, դատավոր Հովսեփյանից բազմաթիվ բողոքներ ու դիմումներ կան, եւ ԲԴԽ-ն ստիպված է եղել նոր վարույթ հարուցել, որն էլ ընդհատվել է նիստի ժամանակ դատավորի վատ զգալու պատճառով:

Հիշեցնենք, որ կոնկրետ այս կարգապահական վարույթի համար հիմք է հանդիսացել փաստաբան Գոռ Մարգարյանի դիմումը։ Փաստաբանն իր դիմումում նշել է, որ դատավոր Նաիրա Հովսեփյանի վարույթում քննվել է քաղաքացիական գործ՝ ըստ հայցի «Քլասիս Լայթինգ» ՍՊԸ-ի՝ ընդդեմ Մինիոնա Դեմիերր-Պետրոսյանի՝ գումարի բռնագանձման պահանջով։

Գործը լուծելու արդյունքում կայացվել է վճիռ, որը պետք է հրապարակվեր «Դատալեքս» տեղեկատվական համակարգում 2023 թ. մայիսի 31-ին, բացի այդ` վճիռը պետք է ուղարկվեր հայցվորին` ոչ ուշ, քան վճռի հրապարակման հաջորդ օրը, այն է՝ 2023-ի հունիսի 1-ին, սակայն մինչ օրս այն ոչ միայն հրապարակված չէ Դատալեքսում, այլ նաեւ ուղարկված չէ հայցվորին։