Հայաստանի Հանրապետության տարածքից որևէ միլիմետր հող չի հանձնվել։
Այս մասին Հանրային ՀԸ եթերում մեկ անգամ ևս հայտարարեց ՀՀ անվտանգության խորհրդի քարտուղար Արմեն Գրիգորյանը։
Գրիգորյանն ասաց՝ սահմանազատման գործընթացում գծվել է սահմանը, որի մի կողմում ՀՀ տարածքն է, մյուսում՝ Ադրբեջանի։
Ինչ է մնացել այս կամ այն կողմում՝ Պետրոս Ղազարյանի հարցին ի պատասխան, Գրիգորյանն ասաց՝ այս կողմում մնացել է այն, ինչը Հայաստանինն է։
«Ավելի առարկայական՝ նախ եկեղեցին Ադրբեջանին չի անցել, ՀՀ տարածքում է և սահմանազատման գործընթացի շրջանակներում սահմանի գիծն անցնում է եկեղեցուց հնարավորինս հեռու։ Եվ այդ առումով, այն ՀՀ տարածքում է։
Ինչ վերաբերում է տարածքներին, ապա մինչ այս պահը այդ տարածքներում ԶՈՒ-ն էր ծառայություն իրականացնում և դրա պատճառով որտեղ դիրքեր կան, համայնքներն այդ հողերին հասանելիություն չեն ունեցել։ Հիմա երբ որ սահմանապահ զորքերքն են տեղակայվում, այդ տարածքներն ազատվում են և անցնում են գյուղացիների վերահսկողության տակ։
Այս առումով ևս մեկ անգամ կարող եմ պնդել, որ սահմանազատման գործընթացը հաջող է և նախադեպ է, որ շարունակենք այն հենց 1976 թվականի քարտեզներով»,- ասաց ԱԽ քարտուղարը։
Արմեն Գրիգորյանը նաև անդրադարձավ ընդդիմադիրների՝ միակողմանի զիջումների վերաբերյալ մեջբերումներին։
«Ի՞նչ նկատի ունեն զիջել ասելով։ ՀՀ-ն իր տարածքից որևէ բան չի զիջել։ ՀՀ տարածքն անցնում է այնտեղով, որտեղով անցնում է 1976 թվականի քարտեզով եղած սահմանը։ Քո ենթակայության տակ լինելն ու քոնը լինելը տարբեր բաներ են։ Լեգիտիմությունն այնտեղ է, որտեղով անցնում է ՀՀ սահմանը և քոնն է այն, ինչը լեգիտիմության շրջանակներում պատկանում է Հայաստանի Հանրապետությանը»,- ասաց Արմեն Գրիգորյանը։
25 հեկտարի մասով որևէ բլեֆ չկա, մեզ է վերադարձվում և հնարավորություն ենք ունենալու այդ տարածքներն օգտագործել։
Ըստ Գրիգորյանի, սահմանազատման շրջանակներում շատ է քննարկվում Տավուշի 4 գյուղի՝ Ոսկեպարի, Բաղանիսի, Կիրանցի, Բերքաբերի շուրջ հնարավոր դելիմիտացիայի ազդեցությունը։ Ոսկեպարում, Բաղանիսում և Բերքաբերում մեծ հաշվով խնդիր չեն լինի, սահմանն արդեն դելիմիտացիայի շրջանակներում հայտնի է։
«Ինչ վերաբերում է Կիրանցին, այո, որոշակի խնդիրներ կան։ Ճանապարհի մասով մենք արդեն լուծումներ ունենք, կտանք։ Այս պահին որևէ խնդիր չկա երկարաժամկետ ինչ խնդիր էլ լինի, լուծելու ենք։
4 շինություն կա, որը 1976 թվականի քարտեզով չի մնում Հայաստանի Հանրապետության տարածքում, դրանցից մեկը տուն է, մեկը կացարան, մյուսը խանութ-վագոն է, որն այս պահին չի աշխատում, 4-րդն ավտոտնակ է։
Այս բոլոր խնդիրները Կառավարությունը հասցեագրելու է, այսինքն բնակչությունն ինչ խնդիր էլ ունենա՝ մենք լուծելու ենք։
Ճանապարհն էլ ենք կառուցելու։ Այսինքն ունենալու ենք ճանապարհ, որն ամբողջությամբ ՀՀ տարածքով է անցնելու, և ինչպես բազմիցս նշել ենք, մենք համոզված ենք, որ այս գործընթացով մենք ավելի շատ անվտանգության երաշխիքներ ենք ստեղծում»,- ասաց Արմեն Գրիգորյանը։
Սահմանազատման ողջ գործընթացն արվել է խաղաղության հաստատման համար։ Այս մասին Հանրային ՀԸ եթերում հայտարարեց ՀՀ անվտանգության խորհրդի քարտուղար Արմեն Գրիգորյանն՝ անդրադառնալով ընդդիմության դիտարկումներին, թե գործընթացը Հայաստանին մոտեցնում է պատերազմին։
«Մենք համոզված ենք, որ սա կայունություն է բերելու։ Այս գործընթացը ամենասկզբում հնարավոր էսկալացիայի գործընթաց է եղել, բայց փոխարինվել է դիվանագիտական լուծմամբ։ Եվ այս դիվանագիտական լուծումը մեր համոզմամբ, Հայաստանին ավելի շատ կայունություն է բերելու։ Շարունակական աշխատանքը խաղաղություն է բերելու տարածաշրջանին»,- ասաց Արմեն Գրիգորյանը։
Բաց մի թողեք
Հրապարակվել է Հայաստանի և Ադրբեջանի միջև սահմանազատման հանձնաժողովների համատեղ գործունեության կանոկակարգը
Հայաստանը ադրբեջանական կողմին է փոխանցել խաղաղության պայմանագրի 10-րդ փաթեթը. Կոստանյան
Շահագործման է հանձնվել զինվորական հերթական ճաշարանը․ Տեսանյութ