Երևանի նախկին քաղաքապետ Ալբերտ Բազեյանն ազատ կարձակվի

Երևանի նախկին քաղաքապետ Ալբերտ Բազեյանն ազատ կարձակվի։

Բազեյանի տնային կալանքի ժամկետը երկարացնելու միջնորդություն քննիչը չի ներկայացրել, իսկ տնային կալանքի ժամկետը լրացել է։

Սեպտեմբերի 24-ն ԱԱԾ–ն հայտնել էր, որ Բազեյանը և «Խաչակիրներ» ռազմահայրենասիրական կազմակերպության ևս 7 անդամներ ձերբակալվել են իշխանությունը զավթելու փորձի համար:

«Դեռ չեն փոխել խափանման միջոցը, բայց ըստ իմ փաստաբանի՝ այսօր կամ վաղը կալանքից պիտի դուրս գամ»,- այս մասին ասաց պահեստազորի գնդապետ, քաղաքական գործիչ Ալբերտ Բազեյանը։

Մենք գրել էինք, որ Երեւանի նախկին քաղաքապետ Ալբերտ Բազեյանը, ով մեղադրվում է Փաշինյանի դեմ մահափորձի մեջ, 6 ամիս կալանավորված էր, իսկ ապրիլից 5 ամիս տնային կալանք է կրում: Այսօր քննվելու է ևս 2 ամսով երկարացնելու հարցը: Սակայն գործը կառուցված է 1 անձի` ոմն Արմեն Հարությունյանի ցուցմունքի վրա, ով առերեսման ժամանակ ասել է, որ նրան ճանաչել է որպես քաղաքական գործիչ` հեռակա կարգով, չի շփվել հետը: Սակայն քննիչը հետագայում գրել է, որ առերեսման ժամանակ վկան պնդել է նախաքննական ցուցմունքը:

Բազեյանի նյարդերն արդեն տեղի են տալիս, նա հայտարարել է, որ եթե կրկին երկարացնեն կալանքը` իրեն զրկելով տեղաշարժից և սահմանադրական իրավունքներն իրացնելուց, չի ենթարկվելու այդ որոշմանը։

Փաստորեն նա շուտով կլինի ազատության մեջ։ «Փաստաբանս ասաց, որ գալու են տնային կալանքի սահմանափակումները հանեն։ Դեռ չեն եկել, սպասում եմ»,-նշեց նա։

Խոսքը էլեկտրոնային վերահսկողության ոտքի բրասլետի մասին է, որը տեղադրվում է խափանման միջոցը տնային կալանք ընտրված անձի նկատմամբ: