Միրզոյանի մոսկովյան այցի ինտրիգը

Հայաստանի արտաքին գործերի նախարար Արարատ Միրզոյանը հրավիրվել է Ռուսաստան։

«Նա հրավերն ընդունել է, հուսով ենք այցը մոտ ժամանակներս տեղի կունենա»,- երկու օր առաջ լրագրողների հետ զրույցում հայտարարել է ՌԴ արտգործնախարար Սերգեյ Լավրովը։

«Պաշտոնական մակարդակում հայ-ռուսական հարաբերություններն այսօր բարդ են», – պնդել է Լավրովը:

Հայ-ռուսական հարաբերությունների ներկա ընթացքը Լավրովը բնութագրել է հնարավորինս դիվանագիտական «բարդ» բառով, թեև ավելի տեղին կլինի «ճգնաժամ» տերմինը:

Ռուս-ուկրաինական պատերազմի մեկնարկից հետո Մոսկվայի առաջնահերթությունները փոխվեցին, ու Հայաստանի դաշնակիցն օբյեկտիվ և սուբյեկտիվ պատճառներով չի կարողանում ամբողջ ծավալով իրականացնել դաշնակցային պարտավորությունները:

Մյուս կողմից, Նիկոլ Փաշինյանի իշխանությունը որդեգրել է երկրի ստրատեգիական կողմնորոշումը փոխելու արկածախնդիր քաղաքականություն, ինչի հետևանքով հայ-ռուսական հարաբերություններում ավելանում է տոկսիկ բաղադրիչը:

Վերջին օրերին իշխանական ակնհայտ քաջալերանքով խրախուսվում է հակառուսական հռետորաբանությունը՝ չարդարացված ակնկալիքներ ձևավորելով ԵՄ-ի և ԱՄՆ-ի հանդեպ:

Այս համատեքստում դժվար է ակնկալել, թե Միրզոյանի մոսկովյան այցը կարող է բեկում մտցնել հայ-ռուսական հարաբերություններում, մանավանդ, որ դրանցում ավանդաբար առանցքային դեր է վերապահված պետության առաջնորդներին:

Սուրեն Սուրենյանց