Փաշինյանի հյուրընկալած թուրք լրագրողը Երևանում անցկացրած մեդիատուրի մասին իր ռեպորտաժում «պատմական թուրքական» է որակել

CNN Turk լրատվական ծառայության տնօրեն Իդրիս Արիկանը Երևանում անցկացրած մեդիատուրի մասին իր ռեպորտաժում «պատմական թուրքական» է որակել ինչպես մայրաքաղաքն ընդհանուր առմամբ, այնպես էլ Երևանի կենտրոնում գտնվող պարսկական Կապույտ մզկիթը։

Ռեպորտաժի այս հատվածը չի վրիպել ամերիկացի լրագրող Լինսի Սնելի ուշադրությունից, և նա այն տեղադրել է «X» սոցցանցի իր էջում: Իդրիս Արիկանը եղել է թուրքական լրատվամիջոցների ներկայացուցիչների խմբի կազմում, որոնք անցյալ շաբաթ հարցազրույց են վերցրել ՀՀ վարչապետ Նիկոլ Փաշինյանից։

Հիշեցնենք՝ նրանք Երևան էին եկել հայկական կողմի հրավերով և ՀՀ բյուջեի հաշվին։

Այդ մեդիատուրի կազմակերպիչներից ՀՀ վարչապետի աշխատակազմի հանրային կապերի և տեղեկատվության կենտրոնի տնօրեն Գոռ Ծառուկյանը «Ֆեյսբուքի» իր էջում պարզաբանել է, որ թուրքական հեռուստաալիքը սկզբում բավականին հավասարակշռված ռեպորտաժ է պատրաստել, այնուհետև ադրբեջանական կողմի ճնշմամբ նկարահանել է երկրորդ` կողմնակալ և հակահայկական նյութը, որտեղ ներառված է նաև մզկիթի մասին հատվածը։

Ավելի ուշ 2–րդ ռեպորտաժը հեռացվել է Youtube–ի ալիքից, սակայն այն մնացել է հեռուստաալիքի կայքէջում։